बिश्वकै सबैभन्दा सस्तो बजाजको क्यूट कार डिसेम्वरमा सार्वजनिक हुदै

चर्चित भारतीय अटोमोवाइल कम्पनी बजाजले सस्तो मूल्यको ‘क्युट’ कार आगामी डिसेम्बर महिनामा सार्वजनिक गर्ने भएको छ । मोटरसाइकल, स्कुटर र अटो रिक्सा उत्पादनमा निकै चर्चा कमाएको बजाजको कार सेग्मेन्टमा उपस्थिति यो नै पहिलो हो ।

अबको ६ महिनामा भारतीय बजारमा ल्याउन लागिएको बजाज ‘क्युट’ले इन्डोनेसियामा भने बिक्री वितरण गर्दै आइरहेको छ । यसको इन्डोनेसियामा मुल्य १ लाख २८ हजार भारतीय रुपैयाँ रहेको छ ।

उक्त कारले ३६ किलोमिटर माइलेज दिने र अहिलेसम्म बनेका कारहरु मध्ये सबैभन्दा कम प्रदुषण गर्ने कम्पनीको दाबी रहेको छ ।

बजाज ‘क्युट’ नाम दिइएको कार २७५२ मिलिमिटर लम्बाई, चौडाई १३१२ मिलिमिटर, उचाईं १६५२ मिलिमिटर र ह्विलबेस १९२४ मिलिमिटर रहेको छ ।

विभिन्न ६ रङमा उपलब्ध यो कारमा एसी, पावर स्टेयरिङ, वाइपर विन्डो, विद्युतीय मिटर र अडियो सिस्टम जस्ता विशेषता पनि छ ।

सानो क्षमताको इन्जिन भए पनि कारका रुपमा विकसित गरिएकाले यसलाई सुरक्षित मानिएको छ । यो कारमा २१६।६ सिसिको इन्जन जडान गरिएको छ जुन बजाज २२० पलसरको भन्दापनि कम हो । अन्य कारको तुलनामा यो कार निकै हलुको रहेको छ । यसको कुल तौल ४५० केजी रहेको छ ।

डिजिटल ट्राइस्पार्क फोर भल्व इन्जिन राखिएको कारमा ०।२ लिटरको वाटरकुल्ड इन्जिन छ भने, ५ वटा गियरबक्स रहेको छ । कारको अधिकतम स्पिड क्षमता ७० किलोमिटर प्रतिघण्टा रहेको छ ।

यस अघि भारतीय अटोमोबाइल कम्पनी टाटाले सन् २००९ मा विश्वकै सबैभन्दा सस्तो कार भनेर नानो कार ल्याएको थियो ।

यहि क्रममा नेपाली बजारमा प्रबेश गर्ने आँकलन सबैले गरेका होलान तर, यो कार नेपाली बजारमा भने आउने छैन ।

Leave a Reply

Your email address will not be published. Required fields are marked *