Sandeep_Lamichhane

पीएसएलमा उत्कृष्ट लयमा सन्दीप, सर्वाधिक विकेट लिनेमा शीर्ष पाँचमा

काठमाडौं— फागुन १६।

नेपाली राष्ट्रिय टोलीका लेग स्पिनर सन्दीप लामिछाने आवद्ध टोली लाहोर कलान्दर्सले पाकिस्तान सुपर लिग (पीएसएल) मा आज (बिहीबार) कराँची किङ्ससँग प्रतिस्पर्धा गर्दैछ ।

दुवई अन्तर्राष्ट्रिय क्रिकेट मैदानमा नेपाली समयअनुसार पौने १० बजे कराँची र कलान्दर्सबीचको खेल हुनेछ ।

लेगस्पिनर सन्दीपले पीएसएलमा आफ्नो प्रभाव कायम गर्न सफल भएका छन् । पीएसएलको आफ्नो पहिलो खेलमा सन्दीप महंगा सावित भएका थिए । त्यसपछिका दुई खेलमा सन्दीप लगातार आफ्नो बलिङ कसिलो गर्दै विपक्षी ब्याट्सम्यानमाथि हावी भइरहेका छन् । बुधबार सन्दीपले आफ्नो करियरको उत्कृष्ट बलिङ प्रदर्शन गरे ।

पीएसएलको पहिलो खेलमा सुल्तान मुल्तानविरुद्ध ४ ओभर बलिङ गर्दै ४६ रन खर्चेर २ विकेट लिएका सन्दीपले क्वेटा विरुद्धको खेलमा ४ ओभर नै बलिङ गरेर २० रन खर्चदै १ विकेट लिएका थिए । सन्दीपले आफ्नो तेस्रो खेलमा उत्कृष्ट बलिङ गर्दै क्वेटा ग्लाडियटर्सविरुद्ध ४ ओभरै बलिङ गर्दै १० रन मात्रै खर्चेर ४ विकेट लिएका थिए । उक्त खेलमा उनी म्यान अफ दि म्याच समेत घोषित भएका थिए ।

आज कराँची किङ्स विरुद्ध ख्ेल्न लागेको लाहुरका लागि सन्दीपले आफ्नो उत्कृष्ट लय कायम राख्ने अपेक्षा नेपाली क्रिकेट प्रशंसकले गरेका छन् ।

सन्दीपले पीएसएलमा खेलेका ३ खेलमा १२ ओभर बलिङ गर्दै ७६ रन खर्चेर ८ विकेट लिँदै शीर्ष पाँचौं स्थानमा रहेका छन् ।

(खबर हब)

CPN Secretariat Committee Meeting

नेकपा सचिवालय बैठकले गर्यो पार्टीको झण्डा आधा झुकाउने, २३ गते श्रद्धान्जली सभा गर्ने निर्णय

काठमाडौं— फागुन १६।

नेपाल कम्युनिस्ट पार्टी (नेकपा)ले पार्टीका नेता एवं संस्कृति पर्यटन तथा नागरिक उड्डयन मन्त्री रवीन्द्र अधिकारीको निधनमा पार्टीको झण्डा आधा झुकाउने निर्णय गरेको छ ।

विहीवार बालुवाटारमा बसेको सचिवालय बैठकले आज पार्टीको झण्डा आधा झुकाउने निर्णय गरेको हो ।

बैठकपछि पार्टीका प्रवक्ता नारायणकाजी श्रेष्ठले भने,‘आज पार्टीको झण्डा आधा झुकाउने र तीन दिनसम्म पार्टी कार्यालयहरुमा शोक पुस्तिका राख्ने निर्णय गरिएको छ ।’

त्यस्तै नेकपाले आगामी २३ गते श्रद्धान्जली कार्यक्रम गर्ने भएको छ ।

सचिवालय बैठकले दुर्घटनामा परि निधन भएकाको परिवारको आर्थिक स्थिति र आवश्यकता समेत हेरेर उपयुक्त सहयोग गर्न सरकारलाई अनुरोध गर्ने निर्णय गरेको छ ।

(खबर हब)

ताप्लेजुङबाट दुर्घटनामा मृत्यु भएका सातै जनाको शव बोकेर काठमाडौंतर्फ उड्यो हेलिकोप्टर

काठमाडौं— फागुन १६।

पर्यटनमन्त्री रविन्द्र अधिकारीसहित सात जनाको शव बोकेर नेपाली सेनाको हेलिकोप्टर ताप्लेजुङको सुकेटार विमानस्थलबाट काठमाडौं उडेको छ ।

दुर्घटनामा मृत्यु भएका सातै जनाको शवलाई सुकेटर विमानस्थलमा बिहीबार बिहानै ल्याई पु-याएको भएपनि खराब मौसमका कारण शव पठाउन ढिला भएको प्रमुख जिल्ला अधिकारी अनुज भण्डारीले बताए । मौसम खुल्ने बितिकै शव काठमाडौं पठाइएको हो ।

फुङलिङ नगरपालिका १० को दारेभीरमा बुधबार हेलिकोप्टर दुर्घटना हुँदा संस्कृति, पर्यटन तथा नागरिक उड्यन मन्त्री रविन्द्र अधिकारीसहित सात जनाको मृत्यु भएको थियो ।

(नयाँ पत्रिका)

gadi and jeep accident on dang

दाङमा भएको सवारी दुर्घटनामा दुईको मृत्यु, पाँच घाइते

दाङ— फागुन १६।

दाङमा सवारी दुर्घटना हुँदा दुई जनाको मृत्यु भएको छ । पाँच जना घाइते भएका छन् । मृत्यु हुनेमा सवारी चालक दाङ तुलसीपुर उपमहानगरपालिका १९ बाँसगडीका ३५ वर्षीय लालबहादुर रावत र भ्यानमा सवार तुलसीपुर उपमहानगरपालिका १९ छिल्लिकोटका ५५ वर्षीय अमरबहादुर वली रहेका छन् ।

दाङको दुधरासबाट छिल्लिकोट तर्फ जाँदै गरेको लु १ च ५९१२ नम्बरको पिकअप भ्यान बुधबार साँझ दुर्घटना भएको थियो । साँझ पौने ६ बजेतिर भएको दुर्घटनामा तुलसीपुर उपमहानगरपालिका १९ छिल्लिकोटका १६ वर्षीय लिला बहादुर खड्का, तुलसीपुर १९ का छिल्लीकोटका ४४ वर्षीय कर्णबहादुर खड्का, घोराही उपमहनरपालिका १५ रतनपुरका २२ वर्षीया सपना वली सेन ठकुरी र उनका छोरा संदिप सिंह र उनकै अर्का छोरा सुजल सिंह ठकुरी घाइते भएका छन् ।

घाइतेमध्ये लिलाबहादुर खड्काको अवस्था गम्भीर रहेको जिल्ला प्रहरी कार्यालय दाङका प्रहरी नायब उपरीक्षक रामप्रसाद घर्तीले जानकारी दिए । घाइतेहरुको राप्ती प्रादेशिक अस्पताल तुलसीपरमा उपचार भइरहेको छ । गाडीमा दशजना सवार रहेपनि अन्य तीनजनाको अवस्था सामान्य रहेको उनले बताए ।

गाडी सडकबाट करिब एक सय मिटर तल खसेको र बाटो चिप्लो भएका कारण दुर्घटना भएको हुन सक्ने प्रहरी नायब उपरीक्षक घर्तीले बताए ।

(नयाँ पत्रिका)

prachand

शोकाकुल परिवारलाई भेटेर दाहालद्वारा समवेदना प्रकट

काठमाडौं— फागुन १६।

सत्तारुढ नेपाल कम्युनिस्ट पार्टी (नेकपा) का अध्यक्ष पुष्पकमल दाहालले हेलिकप्टर दुर्घटनामा परी मृत्यु भएका संस्कृति, पर्यटन तथा नागरिक उड्डयन मन्त्री रवीन्द्र अधिकारीका शोकाकुल परिवारलाई भेटेर समवेदना प्रकट गरेका छन् ।

दिवंगत मन्त्री अधिकारीका शोकाकुल बुवा, आमा र पत्नीलाई भेट गर्न दाहाल बिहीबार बिहान पुलचोकस्थित मन्त्रीनिवास पुगेका थिए । उनले सिंगो पार्टी र मुलुक नै यतिबेला शोकमा रहेको भन्दै मन्त्री अधिकारीका परिवारजनलाई धैर्य धारण गर्न आग्रह गरेका थिए ।

दाहालले सोही दुर्घटनामा मृत्यु भएका व्यवसायी आङछिरिङ शेर्पा, नागरिक उड्डयन प्राधिकरणका उपमहानिर्देशक वीरेन्द्रप्रसाद श्रेष्ठ, उपसचिव युवराज दाहालको परिवारसँग पनि भेट गरी समवेदना प्रकट गरेका छन् ।

(ईमेज खबर)

Minister Rabindra Adhikari

विमान दुर्घटनामा निधन भएका मन्त्री अधिकारीको अन्त्येष्टि शुक्रबार गृह जिल्लामा गरिने

पोखरा— फागुन १६।

हेलिकप्टर दुर्घटनामा परी निधन हुनुभएका संस्कृति, पर्यटन तथा नागरिक उड्डयनमन्त्री रवीन्द्र अधिकारीको अन्त्येष्टि उहाँको गृह जिल्ला कास्कीमा हुनेभएको छ ।

कास्की क्षेत्र नं २ बाट सङ्घीय संसद्का लागि निर्वाचित अधिकारीको शव शुक्रबार बिहान ८ बजेदेखि पोखरा प्रदर्शनी केन्द्रमा अन्तिम श्रद्धाञ्जलिका लागि राख्ने तयारी भइरहेको उहाँका स्वकीय सचिव राजेन्द्र आचार्यले जानकारी दिनुभयो ।
मन्त्री अधिकारी पोखरा–३३ भरतपोखरीको जामुनाबोटमा जन्मनुभएको हो ।
स्वकीय सचिव आचार्यका अनुसार अधिकारीको शव काठमाडौँ ल्याइएपछि त्रिवि शिक्षण अस्पतालमा शव परीक्षण गरिनेछ । त्यसपछि नेकपाको केन्द्रीय कार्यालयमा पार्टीको झण्डा ओढाउने र केहीबेर श्रद्धाञ्जलिका लागि राखिने कार्यक्रम छ । गृहमन्त्रालयले निर्णय गरेपछि काठमाडौँ खुलामञ्चमा सम्मानका लागि लगिनेछ । सरकारले अधिकारीको राजकीय सम्मानका साथ अन्त्येष्टि गर्ने मन्त्रिपरिषद्ले बुधबार निर्णय गरिसकेको छ ।
पोखरा महानगरपालिका वडा नं ३३ का वडाध्यक्ष शिवप्रसाद आचार्यले आज बेलुकासम्म अधिकारीको शव पोखरा ल्याउने तयारी भएको र शुक्रबार बिहान ८ बजेदेखि अन्तिम श्रद्धाञ्जलिका लागि राखी त्यसपछि अन्त्येष्टि गरिने जानकारी दिनुभयो ।

(रासस)

suketar

सातै जनाको शव सुकेटार विमानस्थलमा ल्याइयो, दुर्घटनास्थलमा उद्धारकर्मी अलपत्र

काठमाडौं— फागुन १६।

हेलिकप्टर दुर्घटनामा निधन भएका पर्यटनमन्त्री रवीन्द्र अधिकारीसहित सातै जनाको शव सुकेटार विमानस्थलमा ल्याइसकिएको छ । बुधबार साँझ चार जनाको शव ल्याइएकोमा बिहीबार बिहानै बाँकी तीनजनाको शवसमेत दुर्घटनास्थलबाट विमानस्थलमा ल्याइएको हो ।

बिहान केहीबेर मौसम सफाजस्तो भए पनि पुनः सुकेटार आसपास मौसम खराब भएको छ । मौसम अनुकुल हुनासाथ सातैजनाको शव काठमाडौं पठाउने तयारी भएको छ ।

यसैबीच बुधबारदेखि नै दुर्घटनास्थलमा उद्धारका लागि रहेका ताप्लेजुङ जिल्लाका प्रहरी प्रमुख डिएसपी सञ्जयसिंह थापासहित करिब ४५ सुरक्षाकर्मीलाई फर्कन कठिनाइ भएको छ । दुर्घटनास्थलमा बाक्लो हिमपात भएका कारण उनीहरुलाई फर्कन कठिनाइ भएको हो ।

उनीहरु गएराति भिरमै बसेका थिए । सो क्षेत्रमा रातभरी हिमपात भएको थियो । उनीहरु डोरीको सहायतामा दुर्घटनास्थल पुगेका थिए । रातभरी चिसोमा कठ्यांग्रिएर बसेका र मौसमसमेत प्रतिकुल भएका कारण उनीहरुलाई फर्कन कठिनाइ भएको हो ।

(ईमज खबर)

मन्त्रिपरिषद्

सरकारद्वारा आज राष्ट्रिय शोक घोषणा, सरकारी कार्यालयहरुमा राष्ट्रिय झण्डा आधा झुकाइने

काठमाडौं— फागुन १६।

सरकारले आज राष्ट्रिय शोक मनाउने निर्णय गरेको छ ।

संस्कृति, पर्यटन तथा नागरिक उड्ड्यनमन्त्री रवीन्द्र अधिकारीसहित सातजनाको ज्याने गरी बुधबार भएको हेलिकप्टर दुर्घटनापछि बसेको मन्त्रिपरिषद्को आकस्मिक बैठकले बिहीबार राष्ट्रियशोक मनाउने निर्णय गरेको हो । यसक्रममा सरकारले आजका लागि देशभर सार्वजनिक बिदा घोषणा गरेको छ ।

राष्ट्रिय शोक मनाउने क्रममा देशभरका सबै सरकारी कार्यालयमा राष्ट्रिय झण्डा आधा झुकाइने छ ।

यस्तै, दिवङ्गत मन्त्री अधिकारीको राजकीय सम्मानका साथ अन्तिम संस्कार गर्ने निर्णय पनि मन्त्रिपरिषद बैठकले गरेको छ ।

दुर्घटनाको सम्बन्धमा विस्तृत जाँचबुझ गरी सुझावसहितको प्रतिवेदन यथाशीघ्र पेश गर्न सरकारले गैरसैनिक हवाई उडान (दुर्घटना जाँच) नियमावली, २०७१ को नियम १० बमोजिम चार सदस्यीय दुर्घटना जाँच आयोगसमेत गठन गरेको छ ।

आयोगको अध्यक्षमा सरकारका पूर्वसचिव यज्ञप्रसाद गौतम छन् भने सदस्यहरुमा नेपाली सेनाका सहायक रथी दीपकप्रसाद बास्तोला, अवकाश प्राप्त महासेनानी प्रमोद लामा, संस्कृति, पर्यटन तथा नागरिक उड्डयन मन्त्रालयका सहसचिव बुद्धिसागर लामिछाने छन् ।

(ईमज खबर)

दुःख व्यक्त गर्दै देउवाले भने– रवीन्द्र अधिकारी उदयमान युवा नेताका साथै भद्र र सुयोग्य हुनुहुन्थ्यो

काठमाडौं— फागुन १५।

नेपाली कांग्रेसका सभापति शेरबहादुर देउवाले ताप्लेजुङमा भएको हलिकोप्टर दुर्घटनाप्रति दुःख व्यक्त गरेका छन् ।

कांग्रेस सभापति देउवाले एक विज्ञप्ति जारी गर्दै दुर्घटनामा पर्यटनमन्त्री रवीन्द्र अधिकारीसहित सात जनाको दुर्घटना भएकोमा गहिरो दुःख व्यक्त गरेका छन् ।

विज्ञप्ति जारी गर्दै देउवाले रवीन्द्र अधिकारी नेपाली राजनीतिका उदयमान युवा नेताका अलाव व्यक्तिगत रुपमा भद्र रहेको बताएका छन् ।

‘रवीन्द्र अधिकारी नेपाली राजनीतिका उदयमान युवा नेताका अलावा व्यक्तिगत रुपमा भद्र र सुयोग्य हुनुहुन्थ्यो,’ देउवाले जारी गरेको विज्ञप्तिमा भनिएको छ,‘उहाँको आकस्मिक घटनामा निधन भएकोमा नेपाल सरकार, नेपाल कम्युनिस्ट पार्टी र उहाँको व्यक्तिगत परिवारजनप्रति गहिरो समवेदना व्यक्त गर्दछु ।’

कांग्रेस सभापति देउवाले हेलिकोप्टर दुर्घटनाको कारण पत्ता लगाउन सरकारले तत्कालै अनुसन्धान प्रकृया अघि बढाउने विश्वास लिएका छन् ।

(खबर हव)