कोरोना महामारीका कारण गएको चैत ११ गतेबाट बन्द गरिएका सबै क्षेत्र खुल्ला गरिने भएको छ। कोभिड १९ संकट व्यवस्थापन केन्द्र (सीसीएमसी)को आइतबारको बैठकले चैतमा बन्द गरिएका सबै क्षेत्र खुल्ला गर्न मन्त्रिपरिषदमा प्रस्ताव पठाउने निर्णय गरेको हो।
मन्त्रिपरिषद तथा प्रधानमन्त्री कार्यालयका सचिव महेन्द्रप्रसाद गुरागाइँले विद्यालय, सिनेमा हल, जिमलागयत सबै क्षेत्र खुल्ला गर्न मन्त्रिपरिषदमा प्रस्ताव पठाउने निर्णय भएको जानकारी दिए।
उनका अनुसार कोरोनाको नयाँ स्ट्रेन देखिएका कारण बेलायतलगायतका मुलुकबाट नेपाल आउनेहरुलाई १० दिन क्वारेन्टिन गर्ने विषयमा पनि निर्णय भएको छ। यस्तै कोरोनाको दोस्रो लहर आउन सक्ने भएकाले स्वास्थ्य प्रोटोकल पालना गर्नुपर्नेसमेत बताएको छ। र आवश्यकता अनुसार क्षेत्र विशेषमा निर्णय गर्नका लागि जिल्लालाई अधिकार दिनेसमेत निर्णय गरिएको छ।
चैतमा लकडाउनसँगै बन्द भएका अन्य क्षेत्र खुले पनि विद्यालय, सिनेमा हल, जिमलगायत खुलेका थिएनन्। तर, सिनेमा हल भने सिनेमा क्षेत्रले आफूखुशी खुला गरिसकेको छ।
