गीतसंगीत ,ट्रेलर तथा बहुचर्चित कलाकारहरुको कारण चर्चामा रहेको प्रतिक्षित चलचित्र ‘शत्रु गते’ ले मोफसल टुर गर्ने भएको छ । उपत्यका वाहिरका दर्शक तथा सञ्चारकर्मीसंग भेटघाट एवं चलचित्रको प्रमोसन गर्ने उदेश्यले मह शत्रुगते टुर आयोजना गर्न लागेको हो । टुरलाई रुस्लान भोड्काले प्रायोजन गरेको छ ।
‘रुस्लान मह शत्रु गते यात्रा २०७४’ नाम दिइएको यस यात्रामा कलाकार हरिवंश आचार्य , किरण केसी , शिवहरी पौडेल , पल शाह , आँचल शर्मा र जुनु रिजाल काफ्ले रहनेछन । यात्राको क्रममा स्थानीय दर्शकलाई विभिन्न प्रस्तुति समेत पस्किने छन् । यात्रा फाल्गुन २३ गते देखि ३० गतेसम्म चल्नेछ । २३ गते हेटौडा , २४ गते नारायणगढ , २५ गते बुटवल , २६ गते पोखरा , २८ गते बिर्तामोड , २९ गते दमक र ३० गते इटहरीमा हुने जानकारी निर्माता किरण केसीले बताए ।
चलचित्रलाई मह सञ्चारको व्यानरमा निर्माण गरिएको छ भने यसका प्रस्तुतकर्ता किरण केसी हुन् । हरिवंश आचार्यको कथा रहेको छ । पटकथालाई निर्देशक भट्टराई र दीपकराज गिरी तथा संवाद भने निर्देशक भट्टराईले कथाकार हरिवंश आचार्यसंग मिलेर तयार गरेका हुन् ।
चलचित्रमा दीपकराज गिरी , दीपाश्री निरौला , नरेन्द्र कंसाकार , शिवहरी पौडेल , यसोधा श्रेष्ठ र रमिला आचार्य निर्माता रहेका छन् ।
फिल्म चैत्र ९ मा रिलिज हुनेछ ।
