नेपाली चलचित्र क्षेत्रमा लामो समयदेखि योगदान दिदै आएका चलचित्र पत्रकारहरु गिता अधिकारी , तुलसी गिरी भावुक र आर.के. सुवेदी ‘नेपाल चलचित्र कलाकार संघ चलचित्र पत्रकारिता सम्मान–२०७४’बाट सम्मानित भएका छन् । नेपाल चलचित्र कलाकार संघको १६औं वार्षिक साधारण सभाको अवसरमा आयोजित कार्यक्रममा पत्रकारद्वय तुलसी गिरी र गिता अधिकारी सम्मानित भएका हुन ।
पत्रकार तुलसी गिरी म्यूजिक डायरी मासिकका प्रधान सम्पादक हुन् भने गिता अधिकारी मिलाप मासिककी कार्यकारी सम्पादक हुन् । त्यस्तै आरके सुवेदी बक्स–अफिस पत्रिकाका प्रधान सम्पादक हुन् ।
कार्यक्रममा चर्चित जोडी ९मह जोडी० ‘नेपाल चलचित्र कलाकार संघ राष्ट्रिय पुरस्कार–२०७४’बाट सम्मानित भए । १ लाख ११ हजार १११ रुपैयाँ र ताम्रपत्रसहितको सो पुरस्कार मह जोडीलाई प्रदान गरिएको थियो ।
सोही कार्यक्रममा ५१ हजार १११ रुपैयाँसहितको ‘नेपाल चलचित्र कलाकार संघ शान्ति मास्के राष्ट्रिय पुरस्कार–२०७४’ कलाकार आरपी पन्तलाई प्रदान गरियो । कलाकार पन्तले पुरस्कारको रकम कलाकार कल्याणकारी कोषलाई सोही कार्यक्रममा हस्तान्तरण गरे ।
यस्तै, नेपाली चलचित्र क्षेत्रमा चार दशकभन्दा लामो योगदान पुयाएको भन्दै अग्रज नृत्य निर्देशक वसन्त श्रेष्ठ र अग्रज चलचित्र निर्माण नियन्त्रक गेहेन्द्रप्रसाद धिमाललाई ‘नेपाल चलचित्र कलाकार संघ विशेष सम्मान–२०७४’बाट सम्मान गरियो ।
अभिनेत्री दीपिका प्रसाईंलाई ‘नेपाल चलचित्र कलाकार संघ नव प्रतिभा प्रोत्साहन सम्मान–२०७४’ प्रदान गरियो । कलाकार संघका लागि विशेष योगदान दिएका चार व्यक्ति चलचित्र निर्देशक राजेन्द्र सलभ, अग्रज अभिनेता जय श्रेष्ठ, अधिवक्ता शम्भु निरौला र कलाकार प्रकाश धिताललाई ‘नेपाल चलचित्र कलाकार संघ सेवा सम्मान–२०७४’बाट सम्मान गरियो । सम्मानित व्यक्तित्वहरुलाई जनसंख्या तथा वातावरण मन्त्री लालबाबु पण्डित र नेपाल संगीत तथा नाट्य प्रज्ञा प्रतिष्ठानका उपकुलपति एवं अग्रज संगीतकार शम्भुजीत बासकोटाले सम्मान गर्दै सम्मान पत्र प्रदान गरेका थिए ।
