ललितपुरको सातदोबाटो–चापागाउँ सडक त्यहां स्थानीय समेत रहेका लोकप्रिय अभिनेता मदनकृष्ण श्रेष्ठ सहित स्थानीयवासीले बन्द गराएका छन् । सडकमा धुलो उडेको भन्दै स्थानीयवासी भेला भएर सडक बन्द गराएका हुन् । जनताको स्वास्थ्यमाथी खेलवाड गर्न पाईदैन लगायतका प्लेकार्ड बोकेर श्रेष्ठका परिवार सहितका स्थानीयले बाटो बन्द गराएका छन । पटक पटक सडक निर्माणका लागि आग्रह गर्दा पनि कसैबाट सुनुवाई नभए पछि बाध्य भएर बाटो बन्द गर्नु परेको श्रेष्ठ परिवारकी सदस्य तथा समाजसेवी रिन्कु बज्राचार्य श्रेष्ठले बताईन ।
ढोलाहिटीदेखि चापागाउँसम्म एक वर्ष अघि बाटो पिच गरेर मर्मत गरे पनि धेरै खण्डमा अहिले बाटो बिग्रिएको छ । घाम लाग्दा धुलो उड्ने र पानी पर्दा हिलो हुने समस्याले स्थानीयवासी र सो सडकखण्डमा यात्रा गर्नेहरु हैरान छन् ।सडक पिच गर्न माग गर्दै स्थानीयवासी सुनाकोठी बालकुमारी मन्दिर सडकमै बसेपछि सवारी आवागमन अवरुद्ध भएको ललितपुर प्रहरीले जनाएको छ ।
