काठमाडौं समाजको आयोजनामा खेल पर्यटन विकासका लागि अन्नपूर्ण म्याराथन २० जेठमा हुने भएको छ । अन्नपूर्ण गाउँपालिका मूल आयोजक रहने प्रतियोगिता ४२ सय मिटरबाट सुरु भई १६९० मिटरको उचाइमा समाप्त हुने सोमबार आयोजित पत्रकारसम्मेलनमा जानकारी दिइएको छ । प्रतियोगिताको समापनमा पूर्वप्रधानमन्त्री तथा अन्नपूर्ण–काठमाडौं समाजका संरक्षक पुष्पकमल दाहाल प्रचण्डले विजेतालाई पुरस्कृत गर्नेछन् ।
अन्नपूर्ण सेन्चुरी महोत्वसवका अवसरमा पहिलोपटक अन्नपूर्ण म्याराथन प्रतियोगिता सुरुवात गर्न लागेको आयोजकले जनाएको छ । आयोजक समाजले सुरुवाती वर्ष भएकाले योपटक स्वदेशी र विदेशी गरी कुल ८० देखि सय पुरुष प्रतिस्पर्धी सहभागी गराउने जानकारी दियो । अर्को वर्षमा थप बृहत् बनाउँदै महिला सहभागिता गराउने प्रयास पनि गर्ने समाजका उपाध्यक्ष झलकराम अधिकारीले जानकारी दिए ।
‘पर्यटनका लागि सबै मौसम’ भन्ने नाराका साथ हुने म्याराथनका लागि आवश्यक खर्च अन्नपूर्ण गाउँपालिकासँगै अन्नपूर्ण–काठमाडौं समाजलगायतले व्यवस्थापन गर्नेछन् । समाजले ३ जुन १९५० मा फ्रान्सेली आरोहीले सफलतापूर्वक अन्नपूर्ण हिमालको आरोहण गरेको उपलक्ष्य पारेर प्रतियोगिता गर्न लागेको हो ।
