काठमाडौं । मिडिया उद्यमीहरु हरिशरण सुवेदी र प्रमाेद सुवेदी रिपाेर्टर्स क्लबबाट सम्मानित भएका छन् ।
रिपोर्टर्स क्लब नेपालको २५औं वार्षिकोत्सव (रजत महोत्सव) को अवसरमा आयोजित विशेष समारोहमा सुवेदीद्वयलाई विशेष सम्मान गरिएकाे हाे ।
नेपाली टेलिभिजन विज्ञापन बजारमा विगत अढाइ दशकदेखि अनवरत रुपमा क्रियाशिल रहँदै टेलिभिजन उद्याेगकाे श्रीवृद्धिमा अतुलनीय याेगदान पुर्याएकाे भन्दै उक्त सम्मान गरिएकाे हाे ।
टेलिभिजन विज्ञापन बजारकाे संस्थागत विकासलाई थप उचाइमा पुर्याएकाे उल्लेख गर्दै रिपाेर्टर्स क्लवले एडी रिलिजका मिडिया व्यवसायीद्वयलाई सम्मान गरेकाे हाे ।
हरिशरण सुवेदी एडी रिलिजका प्रवन्ध निर्देशक हुन् भने प्रमाेद सुवेदी वित्त निर्देशक हुन् । प्रधानमन्त्री पुष्पकमल दाहालले शुक्रवार आयाेजित कार्यक्रममा उनीहरुलगायत विभिन्न व्यक्तित्वहरुलाई सम्मान गरिएकाे थियाे ।
साे अवसरमा वाेल्दै प्रधानमन्त्री दाहालले भने–‘ देश अहिले आर्थिक रुपले अप्ठ्यारो अवस्थामा गुज्रिएको छ । सुशासनको कुरा पनि छ । उनले थप प्रकाश पार्दै भने,’ रेमिट्यान्सको स्थितिमा गुणात्मक सुधार छ, राजश्व संकलनमा पनि सुधार छ । हामी विदेशी सञ्चितीमा त धेरै राम्रो अवस्थामा आईपुगेका छौं । मैले प्रधानमन्त्रीको हैसियतमा अर्थमन्त्रालय, राष्ट्र बैंकका गभर्नरसँग पनि पटक–पटक बैठक बसेर आर्थिक क्षेत्रमा देखिएको समस्या हल गर्न पहल गरेको छु ।’
नेपाली विज्ञापन बजारमा आफूलाई अब्बल सावित गरेका सुवेदीद्वय गत वर्ष पनि रिपाेर्टर्स क्लवकाे वार्षिकाेत्सवमा सम्मानित भएका थिए । उनीहरु यसअघि विभिन्न दर्जनाैं सम्मानबाट सम्मानित भइ सकेका छन् ।
