रुसका राष्ट्रपति भ्लादिमिर पुटिन मानिसहरुबिच आफ्नो फिटनेस र कडा छवीका लागि परिचित छन् । साधारणतया राती चाँडै सुत्ने र बिहान चाँडै उठ्ने मानिसहरु स्वस्थ हुने बताइन्छ तर पुटिन ठिक विपरित छन् । उनलाई निकै अबेर रातीसम्म काम गर्न मनपर्छ । उनी आफ्ना धेरैजसो काम राती नै गर्ने गर्दछन् । गुप्तचर एजेन्सी केजीबीका पूर्व गुप्तचर बिहान निकै ढिला उठ्ने गर्दछन् ।
अबेर रातीसम्म काम गर्छन्, निकै ढिला उठ्छन् पुटिनः
न्यूजवीकका बेन जूडाले तीन वर्षको कडा मेहनत र अनुसन्धानपछि पुटिनको रुटिनको प्रोफाइल तयार गरेका थिए । जूडाले आफ्नो एक किताब ‘फ्रजाइल एम्पायरः हाउ रसिया फेल इन एण्ड आउट अफ लभ विद भ्लादिमिर पुटिन’ का लागि तीन वर्षसम्म अनुसन्धान गरे । यसमा पुटिनको दिनचर्याबारे बताइएको थियो । ढिला उठ्ने भएकाले पुटिन दिउँसोमात्र आफ्नो नास्ता खान्छन् । न्यूजविकका अनुसार नास्तामा उनी एउटा ठूलो अमलेट वा ओटमिल खाने गर्दछन् । साथै, उनी नास्तामा गुजको अण्डा र पनिर पनि खान्छन् ।
विशेष स्थानबाट आउँछ पुटिनको खानेकुराः
‘द न्यू जारः द राइज एण्ड रेन अफ भ्लादिमिर पुटिन’ का लेखक स्टिवन लि मेयर्सका अनुसार राष्ट्रपति पुटिन ‘बिटरुट र हर्सर्याडिस’ (एक प्रकारको कन्दमूल) ले बनेको जूस पनि पिउँछन् । उनको नास्ता पुटिनका राजनीतिक सहयोगीको मद्दतले तयार हुने गर्दछ । न्यूजविकको भनाई अनुसार पुटिनको खानामा प्रयोग हुने समग्री नियमित रुपमा पेट्रिआर्क किरिलको खेतबाट मगाइन्छ । किरिल रुसका चर्चित धार्मिक नेता हुन् ।
फिटनेसका लागि यसरी व्यायाम गर्छन् पुटिनः
खाना खाएपछि पुटिन करिब दुई घण्टा स्विमिङ गर्छन् । स्विमिङ गरेपछि उनी वेटलिफ्टिङ गर्छन् । गार्जियन पत्रिकाका अनुसार मानिसहरुबिच आफ्नो छवी स्थापित गर्न उनी फिटनेसमा निकै ध्यान दिने गर्दछन् । मेयर्स भन्छन्, ‘यस्तो लाग्छ कि पुटिनको कुकुर कोनी उनको सबैभन्दा नजिक छन् । जब पुटिन स्विमिङ गर्छन् तब कोनी स्विमिङ पूलको किनारामा बसेर उनको प्रतिक्षा गरिरहेको हुन्छ ।’ पुटिन खाने काम र व्यायाम गरुञ्जेल दिउँसो भइसकेको हुन्छ । त्यसपछि मात्र उनी आफ्नो आधिकारिक काम सुरु गर्छन् ।
