भारतको उत्तर प्रदेशमा एकजना डाक्टरले ६ सयजना बिरामीमा नक्कली पेसमेकर लगाइदिएका छन्। यसले गर्दा २ सयजनाको मृत्यु भएको छ। उत्तर प्रदेशको इटावास्थित सैफई मेडिकल कलेजका मुटुरोग विशेषज्ञ डाक्टर समीर सर्राफले पैसाको लोभमा ६ सयजना बिरामीमा नक्कली पेसमेकर लगाइदिएको भारतीय सञ्चार माध्यमहरूले लेखेका छन्।
नक्कली पेसमेकर लगाइएकामध्ये २ सयजनाको मृत्यु भइसकेको उत्तर प्रदेश सरकारले जनाएको छ। घटना पछि डाक्टर अहिले प्रहरी नियन्त्रणमा छन्। डाक्टर सर्राफले सञ्जिव गान्धी पोष्ट ग्रेजुएट इन्स्टिच्यूट (एसजीपीजीआई) को तोकिएको मूल्यभन्दा बदी मूल्यमा बिरामीलाई नक्कली पेसमेकर लगाइदिएको आरोप परिवारजनले लगाएका छन्।
बिरामीका आफन्तको उजुरी पछि सैफई मेडिकल कलेज प्रशासनले छानबिन कमिटी गठन गरेको थियो। छानबिन कमिटीका अनुसार पेसमेकरको तोकिएको मूल्यभन्दा ९ गुणा बढी मूल्य डाक्टर सर्राफले बिरामीसँग असुलेका थिए। साथै ती पेसमेकर नक्कली भएको पनि पुष्टि भयो।
यसैबीच, उत्तर प्रदेशका उप मुख्यमन्त्री केशव प्रसाद मौर्यले घटनाबारे अनुसन्धान गरेर दोषीलाई कडा सजाय दिलाउने बताए। उनले डाक्टर सर्राफका कारण पीडित भएकालाई सरकारले न्याय दिलाउन कुनै कसर बाँकी नराख्ने पनि बताए।
