कन्चनपुर, मंसिर ७ ।
कन्चनपुरमा बलात्कारपछि हत्या गरिएकी १३ वर्षीया बालिका निर्मला पन्तका बुवाको स्वास्थ्य अवस्था दिनप्रतिदिन बिग्रँदै गएको छ ।
छोरीको न्यायका लागि १३औं दिनदेखि धर्नामा बसेका निर्मलाका बुवा यज्ञराज पन्तको शारीरिक स्वास्थ्य अवस्थासँगै मानसिक अवस्था समेत बिग्रँदै गएको हो ।
केही दिनदेखि स्वास्थ्यमा समस्या देखिएपछि चिकित्सकको टोलीले धर्नास्थलमै पुगेर पीडित परिवारको स्वास्थ्य परीक्षण गरेको थियो । तर, पछिल्लो समय यज्ञराजको स्वभाव असामान्य बन्दै गएको देखिन्छ ।
उनको स्वास्थ्य अवस्था बिग्रँदै गएपछि थप उपचारका लागि काठमाडौं लैजाने तयारी भइरहेको कन्चनपुरका निमित्त प्रमुख जिल्ला अधिकारी शंकरबहादुर विष्टले जानकारी गराए ।
यज्ञराजमा रातभरि नसुत्ने, बर्बराउने समस्या देखिएको छ भने दिउँसो निर्मलाको नाम लिँदै रुँदै, अरुलाई गालीगलौज गर्दै हिँड्न थालेका जनाइएको छ।
