नयाँ दिल्ली, मंसिर १४ ।
ऋण माफी र कृषि उपजको उचित मूल्यको माग गर्दै करिब एक लाख किसान भारतको राजधानी नयाँ दिल्लीमा भेला भएका छन् ।
बिहीबारदेखि उनीहरु भारतका विभिन्न क्षेत्रबाट दिल्लीमा आयोजित र्याली र सभामा सहभागिताका लागि आएका हुन् । उनीहरु आज संसद भवन घेराउ गर्ने तयारीमा छन् ।
अखिल भारतीय किसान संघर्ष समन्वय समितिका अनुसार किसान तथा कृषि मजदूरसँग सम्बन्धित विभिन्न २०७ संगठनको सहभागितामा कार्यक्रम आयोजना भएको हो । पञ्जाव, हरियाणा, उत्तर प्रदेश, आन्ध्र प्रदेश, गुजरात, मध्य प्रदेश, महाराष्ट्र, तमिलनाडु, पश्चिम बंगाललगायतका राज्यबाट ठूलो संख्यामा किसानहरु दिल्ली आइपुगेका छन् ।
किसानहरुको र्यालीका कारण नयाँ दिल्लीको यातायात व्यवस्था प्रभावित भएको छ ।
किसानहरु संसद भवन घेराउका लागि जाने तयारी गरिरहँदा स्थानीय प्रशासनले सुरक्षा व्यवस्था कडा तुल्याएको जनाइएको छ । दिल्लीका विभिन्न स्थानमा ठूलो संख्यामा सुरक्षाकर्मी परिचालन गरिएको छ । (एजेन्सी)
