दोहा, मंसिर १७ ।
कतारले पेट्रोलियम निकासीकर्ता मुलुकहरुको संगठन (ओपेक)को सदस्यता अर्को महिनाबाट त्याग्ने घोषणा गरेको छ ।
खाडि राष्ट्र कतारका ऊर्जामन्त्री साद अल–काबीले अब कतारले ग्यास उत्पादनमा आफूलाई ज्यादा केन्द्रित गर्ने घोषणा गरेका छन ।
काबीले सोमबार दोहामा आयोजित पत्रकार सम्मेलनमा कतारले जनवरी २०१९ देखि लागू हुनेगरी ओपेकको सदस्यता त्याग्ने निर्णय गरेको तथा तेल उत्पादनलाई निरन्तरता दिने भएपनि ग्यास उत्पादनमा आफूलाई केन्द्रित गर्ने जानकारी दिए ।
कतार विश्वमै तरल प्राकृतिक ग्यासको सबैभन्दा ठूलो निर्यातक मुलुकमा पर्दै आएको छ ।
‘हामीसँग तेलको त्यति ठूलो सम्भावना छैन । हामी यथार्थपरक हुनैपर्दछ । हाम्रो क्षमता नै ग्यास हो’–मन्त्री साद अल–काबीले बताए ।
सन् १९६१ मा कतार ओपेकको सदस्य राष्ट्र भएको थियो ।
मन्त्री काबीले कतारको निर्णयको बारेमा ओपेकलाई पूर्वजानकारी दिइ सकेको जनाए ।
ओपेकमा तेलको धनी राष्ट्र साउदी अरेबियाको दवदवा कायम रहेको छ । साउदी अरेबियाले ओपेकमा आबद्ध केही राष्ट्रको गठबन्धन बनाइ जुन २०१७ देखि कतारमाथि नाकाबन्दी गर्दै आएको छ । रासस/एएफपी
