काठमाडौं, मंसिर १८ ।
नेपाली कांग्रेस केन्द्रीय समितिको बैठक आज चलिरहेको छ । नेपाली कांग्रेस पार्टी कार्यालय सानेपामा पाँच दिनदेखि जारी बैठकमा प्रस्तावित विधान मस्यौदामाथि विस्तृत छलफल चल्दै छ ।
विधान मस्यौदामाथि केन्द्रीय सदस्यहरुले विभिन्न सुझाव दिने कार्यक्रम जारी छ । यही आउँदो मंसिर २८ गतेबाट काठमाडौंमा बस्ने महासमितिको बैठकमा पेश गरिने पार्टीको विधानलाई एकमत बनाउनको निम्ति केन्द्रीय सदस्यहरुले विभिन्न सुझाव दिइरहेका छन् ।
कांग्रेस महामन्त्री एवं विधान संशोधन मस्यौदा समितिका संयोजक पूर्णबहादुर खड्काले फरक मतसहितको विधान मस्यौदा मंसिर ९ गतेको केन्द्रीय समितिको बैठकमा पेश गरेका थिए । मस्यौदामाथि टिप्पणी गर्ने सदस्यहरुको संख्या बढ्दै गएपछि छलफल पनि लम्बिँदै गएको छ ।
आज बस्ने केन्द्रीय समितिको बैठकमा सहमहामन्त्री डा. प्रकाशशरण महत नेतृत्वको आर्थिक मस्यौदा समितिले प्रतिवेदन पेश गर्ने तयारी गरेको रहेको छ । महासमिति बैठकमा पेश गर्ने आर्थिक प्रतिवेदन तयार भइसकेकाले केन्द्रीय समितिमा पेश गर्ने तयारी गरिएको जनाइएको छ ।
