काठमाडौं,मंसिर-२०।
एभरेष्ट प्रिमियर लिग (ईपिएल) क्रिकेटको दोस्रो संस्करण काठमाडौंमा शनिवार देखि सुरु हुँदैछ ।
लिगको सम्पूर्ण तयारी पूरा भएको आयोजकले बताएको छ । शनिवार हुने उद्घाटन खेलमा ललितपूर प्याट्रिएट्सले विराटनगर वारियर्ससँग भिड्ने छ ।
यसपटक पनि लिगमा ६ टिमले प्रतिस्पर्धा गर्दैछन् ।
यी ६ टोलीहरुमा काठमाडौं किङ्ग्स, ललितपूर प्याट्रिएट्स, पोखरा राईनोज, चितवन टाईगर्स, भैरहवा ग्ल्याडिएटर्स र विराटनगर वारियर्स छन् ।
ईपिएल क्रिकेटमा सहभागि हरेक टोलीमा तिन जना विदेशी खेलाडी समावेश अनिवार्य गरिएको छ ।
यसपटक ईपिएलकै लागि आयरल्याण्डका केभिन ओब्रायन, हङकङका बाबर हयात र अंशुमान राथ, युएईका रोहन मुस्तफा, भारतका गौरब तमोर र सन्नी पटेल, नेदरल्याण्ड्सका रायन टेन डोच्टे, स्कटल्याण्डका केली कोट्जर, दक्षिण अफ्रिकाका रिचार्ड लेभी लगायतका विश्वस्तरिय खेलाडी काठमाडौं आउँदैछन् ।
टेस्ट तथा एक दिवसिय क्रिकेटमा समेत बर्चश्व बनाईसकेका यी खेलाडीहरुको आगमनले इपिएल क्रिकेटलाई बेग्लै उचाईमा पुर्याउने खेलाडी तथा खेलप्रेमीहरुको विश्वास रहेको छ ।
