काठमाडौं, मंसिर-२४ ।
विश्व मानवअधिकार दिवस नेपालमा पनि विभिन्न कार्यक्रमहरु गर्दै आज मनाईंदै छ ।
संयुक्त राष्ट्र संघकोमहासभाले सन् १९४८ को डिसेम्बर १० मा मानवअधिकारसम्बन्धी विश्वव्यापी घोषणापत्र जारी गरेको थियो ।
महासभाले मानवअधिकारसम्बन्धी विश्वव्यापी घोषणापत्र पारित गरेको दिनको सम्झनामा हरेक वर्ष डिसेम्बर १० को दिन विश्व मानवअधिकार दिवस मनाउने गरिन्छ ।
यसैको अवसरमा विश्व मानवअधिकार दिवसको शुभकामना सन्देश दिँदै प्रधानमन्त्री केपी शर्मा ओलीले कानुनको सर्वोच्चताविरुद्ध कुनै पनि प्रकारका गतिविधिप्रति सैह्य नहुने जनाएका छन् ।
मानवअधिकार उल्लंघन हुन नदिन र मानवअधिकार उल्लघंनका दोषीलाई कानुनको दायरामा ल्याउने प्रतिवद्धता समेत उनले व्यक्त गरेका छन् ।
प्रधानमन्त्री ओलीले पीडितलाई क्षतिपूर्ति र न्याय दिलाउन पनि सरकार त्यत्तिकै सजग रहेको जनाएका छन् ।
मानवअधिकार र संक्रमणकालीन न्यायको विषयलाई सरकारले प्राथमिकतासाथ हेरेको बताउदै प्रधानमन्त्री ओलीले द्वन्द्वपीडितलाई न्यायको अनुभूति गराउन सरकार प्रतिबद्ध रहेको बताएका छन् । त्यसको निम्ति आवश्यक कानुनी व्यवस्था संशोधनका कार्य अगाडि बढाइने उनको भनाइ छ ।
