काठमाडौं, मंसिर-२४ ।
काठमाडौं किङस इलाभेनले तेस्रो संस्करणको टिभिएस एभरेष्ट प्रिमियर लिग (ईपीएल) टी–ट्वान्टी क्रिकेटमा विजयी सुरुवात गरेको छ ।
आज भएको खेलमा पृथु बास्कोटाको कप्तानीमा रहेको चितवन टाइगर्सलाई ६ विकेटले हराउँदै सोमपाल कामीको कप्तानीमा रहेको काठमाडौंले विजयी सुरुवात गरेको हो ।
टियु क्रिकेट मैदानमा चितवनले दिएको १६१ रनको लक्ष्य काठमाडौंले १८ ओभर ५ बलमा मात्र ४ विकेट गुमाएर भेट्यो ।
काठमाडौंको जितमा भारतीय खेलाडी सुब्रमनियन आनन्दले १८ बलमा अविजित रहदै ४३ रन जोडे । सुब्रमनियन प्लेयर अफ दि म्याच भए ।
यस्तैमा अमर सिंह रौटेला २१ रनमा अविजित रहे । त्यस्तै काठमाडौंका लागि सागर पुनले ३९ रन जोड्दा नरेश बुढाएरले २२ तथा अमित श्रेष्ठले १८ रन को योगफल जोडे । चितवनकालागि साहब आलमले २ विकेट लिए ।
यसअघि टस हारेर पहिले ब्याटिङ गरेको चितवनले १९ ओभर ५ बलमा अलआउट हुनुपूर्व १६० रनको बनाएको थियो ।
चितवनका लागि दिपेन्द्र सिंह ऐरीले ४५ रन जोड्दा पल स्टर्लिङले ३४ रनको जोडे ।
यस्तै सन्दीप सुनारले २५ तथा पृथु बास्कोटा २० रनमा अविजित रहे । काठमाडौंका संसद सेख र प्रदीप साहुले ३ / ३ विकेट लिए ।
जितसंगै काठमाडौंले २ अंक जोड्यो । चितवनले भने लगातार दोस्रो हार ब्योहोर्दा २ खेलबाट कुनैपनि अंक जोड्न सकेको छैन ।
यसअघि आफ्नो पहिलो खेलमा चितवन ललितपुर प्याट्रीयट्ससंग ११ रनले पराजित भएको थियो ।
