दाङ, मंसिर २८ ।
दाङमा आगलागीमा परेर एकै परिवारका तीन जनाको मृत्यु भएको छ । फुसले छाएको घरमा आगलागी हुँदा बङ्गलाचुली गाउँपालिका–८ गुराँसे निवासी नवराज पुनका दुई छोरी र एक छोराको घर भित्र जलेर मृत्यु भएको हो ।
बिहीबार राति करिव ८ बजेतिर सोलार ब्याट्री पड्किएर घरमा आगलागी भएको हो । आगलागीमा पुनका सात वर्षीय छोरा कृष्णकुमार, पाँच वर्षीया छोरी अस्मिता र दुई वर्षीया छोरी अञ्जुको मृत्यु भएको दाङ जिल्ला प्रहरी कार्यालयका प्रहरी नायब उपरीक्षक रामप्रसाद घर्तीले जनाए ।
नवराजको एक वर्षीय छोरा बिरामी भएका कारण तीन छोराछोरीलाई घरमा सुताएर नवराज र उनकी श्रीमती झारफुक गराउन गाउँ गएका बेला अकस्मात सोलार ब्याट्री पड्किएर आगलागी भएको प्रहरीको प्रारम्भिक अनुमान रहेको छ । स्थानीयवासी र हाँसीपुर प्रहरीचौकीबाट गएका प्रहरीको सक्रियतामा राति १२ बजे आगो नियन्त्रणमा लिइएको थियो । आगलागीबाट सात गाई र चार बाख्रा साथै घरमा रहेका सामान समेत जलेर नष्ट भएका छन् ।
