काठमाडौं, पुष-०१ ।
इङ्लिस प्रिमियर लिग फुटबलको साविक विजेता म्यानचेस्टर सिटी लिगको शीर्ष स्थानमा उक्लिएको छ ।
गएराति भएको खेलमा एभर्टनलाई ३–१ ले पराजित गर्दै म्यानचेस्टर सिटी शीर्ष स्थानमा उक्लिएको हो ।
घरेलु मैदानमा सिटीको जितमा ग्राबियल जिससले दुई गोल गरे भने रहिम स्टर्लिङले अर्को एक गोल थपेका थिए । एभर्टनका लागि भने डोमिनिक काल्भर्ट लेविनले एक गोल फर्काए ।
सिटीको जितमा जिससले खेलको २२ औं र ५० औं मिनेटमा गोल गरेका थिए । त्यस लगत्तै खेलको ६५ औं मिनेटमा एभर्टनका लेविनले गोल गर्दै खेल २–१ को स्थितिमा ल्याए । फेरि ६९ औं मिनेटमा स्टर्लिङले गोल गर्दै सिटीलाई ३–१ को जित दिलाए ।
जितसँगै साविक विजेता सिटीले लिभरपुललाई २ अंकले पछि पार्दै शीर्ष स्थान ओगटेको छ । उपाधि जित्ने होडमा सिटीले १७ खेलबाट ४४ अंक जोडेको छ ।
एक खेल कम खेलेको लिभरपुलको भने ४२ अंक छ । सिटीसँग पराजित एभर्टन २४ अंक सहित आठौँ स्थानमा रहेको छ ।
त्यसैगरी गएराति नै भएको अर्को खेलमा टोटनह्यामले बर्नलेविरुद्ध जित हात पारेको छ ।
टोटनह्यामको घरेलु मैदानमा भएको उक्त खेलमा क्रिस्टियन एरिक्सनले गरेको एक मात्र गोल निर्णायक बन्यो ।
पहिलो हाफ गोलरहित बराबरीमा सकिएपनि खेलको इन्जुरी समयमा एरिक्सनले गोल गर्दै टोटनह्यामको लागि महत्वपूर्ण ३ अंक दिलाए ।
यो जितसँगै टोटनह्यामले १७ खेलबाट ३९ अंक जोडेर तेस्रो स्थानमा यथावत रहेको छ । पराजित बर्नले १२ अंक सहित रेलिगेसन जोनभन्दा एक स्थान मात्र माथि छ ।
प्रिमियर लिगअन्तर्गतकै अर्को खेलमा वेस्टह्याम युनाइटेडले फूलह्यामलाई र उल्भरह्याम्टनले बर्नमाउथलाई समान २–० तथा वाट्फोर्डले कार्डिफ सिटीलाई ३–२ गोल अन्तरले हराएका छन् ।
त्यसैगरी क्रिष्टल प्यालेसले लेस्टर सिटी र न्यूकासलले हडर्सफिल्डलाई समान १–० गोलअन्तरले हराएको छ ।
