नेपाल विद्युत् प्राधिकरणको नयाँ सञ्चालक समिति सदस्यमा देवेन्द्रबहादुर कार्की र महेन्द्रबहादुर गुरुङ नियुत्त भएका छन्। सरकारले कपिल आचार्य र भक्तबहादुर पुनलाई जिम्मेवारीबाट हटाएसँगै कार्की र गुरुङलाई सञ्चालक बनाएको हो।
डेडिकेटेड र ट्रंक लाइन विवादमा नेपाल सरकार तथा विद्युत् नियमन आयोगले दिएको निर्देशन कार्यान्वयनमा ‘नोट अफ डिसेन्ट’ लेख्ने आचार्य र पुनलाई ऊर्जा जलस्रोत तथा सिँचाइमन्त्री दिपक खड्काले पदमुक्त गरेका थिए। सरकारका पूर्वसचिव कार्की ऊर्जा विज्ञ हुन् भने पूर्वसहसचिव गुरुङ उपभोक्ता समितिको तर्फबाट सदस्यका नियुक्त भएको ऊर्जा मन्त्रालयका सहसचिव एवं प्रवक्ता नविनराज सिंहले बताए। दुवै जनाको कार्यकाल चार वर्षको रहनेछ।
प्राधिकरण ऐनको दफा ९ मा सरकारले विद्युत् प्राधिकरणमा सञ्चालक मनोनयन गर्न र हटाउन सक्ने व्यवस्था छ। ऐनको सोही व्यवस्थाअनुरूप पुरानालाई पदमुक्त र नयाँलाई नियुक्त गरिएको ऊर्जा मन्त्रालयले जनाएको छ।
