काठमाडौं, पुष-०२।
एभरेस्ट प्रिमियर लिग (इपीएल) टी–२० क्रिकेट प्रतियोगिता अन्तर्गतको प्लेअफ समीकरण पूरा भएको छ ।
कीर्तिपुरस्थित त्रिवि क्रिकेट मैदानमा आज भएको समूह चरणको अन्तिम खेलमा काठमाडौं किंग्स–११ ले विराटनगर वारियर्सलाई ५ विकेटले पराजित गरेसँगै प्लेअफ समीकरण पूरा भएको हो ।
विराटनगर वारियर्सले दिएको १०१ रनको सामान्य चुनौती काठमाडौंले १७ ओभर ५ बलमै ५ विकेटको क्षतिमा पूरा गरेको हो ।
केभिन ओ’ब्राइनले काठमाडौंका लागि ४३ बलमा अविजित रहँदै ४५ तथा प्रर्दीप साहुले २३ बलमा २१ रन जोड्दा विराटनगरका कप्तान पारस खड्का र रोएलोफ् भान्डर मार्वेले समान २/२ विकेट लिए ।
खेलमा पहिले ब्याटिङ गरेको विराटनगरले १७ ओभर ५ बलमै अलआउट हुँदै १०० बनाएको थियो ।
काठमाडौंका लागि अलराउन्डर ओ’ब्राइनले ३, रोहन मुस्तफा, साहु र बिक्रम भुसालले समान २/२ विकेट लिएका थिए ।
जितसँगै काठमाडौं क्वालिफायरमा पुग्दा विराटनगर भने प्लेअफबाट बाहिरएको छ ।
८ अंकको ललितपुर शीर्ष स्थानमा रहँदै यसअघि नै क्वालिफायरमा पुगेको थियो भने काठमाडौं रनरेटकोमा आधारमा दोस्रो भएर प्लेअफमा पुग्यो।
जारी लिगमा भैरहवा ग्लाडियटर्स ६ अंकसहित तेस्रो तथा चितवन टाइगर्स विराटनगरभन्दा रनरेटको आधारमा अगाडि रहँदै ४ अंकसहित प्लेअफमा पुगेको छ ।
६ टिम सहभागी रहेको उक्त प्रतियोगिताबाट विराटनगर र अंकविहीन पोखरा राइनोज बाहिरिएका हुन् ।
