अभिनेता श्रीदेव भट्टराई ग्लोबल स्टार्स अवार्ड–२०२४ बाट पुरस्कृत भएका छन् । भारतको पटनामा आयोजित समारोहमा अभिनेता भट्टराई पुरस्कृत भएका हुन् ।
निरुलाज एण्ड कम्पनीको प्रस्तुति रहेको उक्त समारोहका प्रमुख अतिथि बिहारका विज्ञान तथा प्रविधि मन्त्री सुमित कुमार सिंह थिए भने अभिनेत्री पूनम ढिल्लो विशेष अतिथिको रुपमा रहेकी थिइन् ।
सांग्रिला प्यालेसमा आयोजित उक्त समारोहमा पुरस्कृत भएसंगै अभिनेता भट्टराईले यसै वर्षमात्र भारतका तीन भिन्न अवार्ड प्राप्त गरिसकेका छन् ।
लामो समयदेखि नेपाली कलाकारिता क्षेत्रमा सक्रिय रहँदै आएका अभिनेता भट्टराईले २०६० सालमा फिल्म ‘भाइमारा’ बाट डेब्यू गरेका थिए । त्यसयता उनले विभिन्न फिल्म, म्युजिक भिडियो तथा विज्ञापनहरुमा अभिनय गरिसकेका छन् ।
कलाकारितामा सक्रिय रहँदै आएका भट्टराईले यस्ता पुरस्कार तथा सम्मानले अभिनय क्षेत्रमा थप उत्साहित भएर काम गर्न सहयोग पुर्याएने प्रतिक्रिया दिएका छन् ।
