काठमाडौं, पुस ६ । सहिद स्मारक ‘ए’ डिभिजन लिग फुटबलमा मच्छिन्द्र क्लबले सरस्वती युथ क्लबलाई पराजित गर्दै प्रतियोगितामा पहिलो जित दर्ता गराएको छ ।
सातदोबाटोस्थित एन्फा कम्प्लेक्सको मैदानमा शुक्रबार भएको खेलमा मच्छिन्द्रले सरस्वतीमाथि ४–२ गोलअन्तरले विजयी हासिल गर्दै जारी लिगमा पहिलो जित दर्ता गराएको हो ।
१० खेल खेलेको मच्छिन्द्रले लिगमा शीर्ष तीन अंक जोडेको यो पहिलोपटक हो ।
मच्छिन्द्रको जितमा कप्तान विशाल राई, विदेशी खेलाडी भसाडिया डाइमान्डे, अनिल गुरुङ र विकास राईले एक/एक गोल गरे ।
खेलमा सुरुआती अग्रता भने सरस्वतीले लिएको थियो । खेलको चौथो मिनेटमा मच्छिन्द्रका खेलाडी सञ्जय राजबहाकले सरस्वतीका लागि आत्मघाती गोल गरे ।
त्यस्तै, खेलको पहिलो हाफको १६औं मिनेटमा मच्छिन्द्रका विशालले एक गोल गर्दै खेललाई एक/एक गोलको बराबरीमा ल्याए ।
विशालले गोल गरेको चार मिनेट पनि बित्न नपाउँदै मच्छिन्द्रका विदेशी खेलाडी डाइमान्डेले एक गोल थप्दै २–१ को अग्रता दिलाए ।
त्यसैगरी, खेलको २५औं मिनेटमा मच्छिन्द्रका अनिलले एक गोल थपे । त्यसपछि खेलको ३६औं मिनेटमा सरस्वतीका विदेशी खेलाडी फ्रान्सिस ओनेयामाले एक गोल थप्दै खेललाई ३–२ को स्थितिमा ल्याए ।
खेलको पहिलो हाफमा ३–२ ले अगाडि रहेको मच्छिन्द्रले दोस्रो हाफमा एक गोल थप्यो । खेलको दोस्रो हाफको अतिरिक्त समयमा विकासले पेनाल्टीमार्फत् एक गोल गरेपछि मच्छिन्द्रले ४–२ को सहज जित हात पार्यो ।
खेलमा ‘म्यान अफ दी म्याच’ मच्छिन्द्रका कप्तान विशाल राई घोषित भए ।
यस जितसँगै मच्छिन्द्र १० खेलबाट ६ अंकका साथ अंकतालिकाको ११औं स्थानमा उक्लिएको छ । समान १० खेल खेलेको सरस्वती १० अंकका साथ नवौं स्थानमा छ । रासस
