क्राइस्टचर्च, पुस- १२ ।
श्रीलंकाविरुद्ध जारी टेस्ट म्याचमा न्यूजिल्याण्डका तीव्र गतिका बलर ट्रेन्ट बोल्टले घरेलु मैदानमा शानदार प्रदर्शन गरेका छन् ।
कुल १५ ओभर बलिङ गर्दा बोल्टले ३० रन खर्चिएर ६ विकेट लिए ।
तर, रमाईलो पक्ष के रह्यो भने उनले सबै विकेट १५ बलको अन्तरालमा हात पारेका हुन । बोल्टले ६ विकेट हात पार्दा १५ बलमा केवल चार रनमात्र दिएका थिए ।
बोल्टले आफ्नो बलिङका क्रममा एउटा ओभरमा यति उत्कृष्ट प्रदर्शन गरे कि, सो ओभरमा कुनै रन नदिइ तीन विकेट लिन सफल भएका थिए ।
बोल्टले श्रीलंकाका रोशन सिल्भा, निरोशन डिकभेला, दिरुवान परेरा, सुरंगा लकमल, दुश्मन्ता चमिरा र लाहिरु कुमारालाई पवेलियन फर्काएका थिए ।
उनले श्रीलंकाको ब्याटिङ क्रमका पुछारका ६ विकेट आफ्नो नाममा लेखाएका हुन् । उनले लिएका विकेटमध्ये ४ वटा ‘एलबीडबल्यु’ थिए भने दुई विकेट टिम साउथीको हातबाट ‘क्याच’ थमाएर हासिल गरेका थिए ।
बोल्टकै घातक बलिङ सामू निरीह हुँदै श्रीलंका कुल १०४ रनमा नै समेटिएको छ । न्यूजिल्याण्डले भने पहिलो पारीमा १७८ रन बनाएको थियो ।
