हुम्लाका उपभोक्ताले अनुदानको नुन खरिद गर्न अब अनिवार्य रूपमा नागरिकताको प्रतिलिपि पेश गर्नुपर्ने भएको छ । साल्ट ट्रेडिङ कर्पोरेसन लिमिटेडको हुम्ला शाखाले मंगलबार मात्रै बिक्री गर्ने नुन लिन प्रत्येक उपभोक्ताले आफ्नो नागरिकताको प्रतिलिपि बुझाउनुपर्ने नियम लागू गरेको छ ।
लिमिटेडका हुम्ला शाखा प्रमुख राजबहादुर लामाका अनुसार यो व्यवस्था उपभोक्ताहरू दोहोरिन नदिने उद्देश्यले ल्याइएको हो । उनका अनुसार वडाको सिफारिस भए पनि नागरिकताको प्रतिलिपि अनिवार्य गरिएको छ, जसले गर्दा नागरिकता नभएका वा प्रतिलिपि निकाल्न असमर्थ व्यक्तिहरू समस्यामा पर्न सक्छन् ।
नागरिकताको फोटोकपी गराउँदा स्थानीयले १० रुपैयाँ थप खर्च गर्नुपर्ने हुन्छ । यसरी प्रतिलिपि पेश गरेपछि मात्र प्रति व्यक्तिलाई १० केजी नुन बिक्री गरिन्छ ।
हाल साल्ट ट्रेडिङको गोदाममा १,३९५ क्विन्टल नुन मौज्दात रहेको छ । चालु आर्थिक वर्षका लागि तोकिएको १,१०० क्विन्टल नुनमध्ये हालसम्म ५८२ क्विन्टल हवाईमार्गबाट ढुवानी भइसकेको छ भने बाँकी नुन पनि ढुवानी प्रक्रियामा रहेको लिमिटेडले जनाएको छ ।
