काठमाडौं, पुस-१६ ।
शहीद स्मारक ‘ए’ डिभिजन लिग फुटबल अन्तर्गत आजबाट १२ औं चरणका खेलहरु सुरु भएका छन् ।
१२ औं चरण अन्तर्गत आजको पहिलो खेलमा न्यूरोड टिम एनआरटीले मच्छिन्द्र क्लबसंग ५–५ गोलको बराबरी खेल्यो ।
एन्फा कम्प्लेक्स सातदोवाटोमा भएको खेलको ३० मिनेटमै मच्छिन्द्रले ४-१ को अग्रता लिएको भएपनि त्यो स्थिति जोगाउन नसक्दा जित निकाल्न सकेन ।
बराबरीसँगै एनआरटी अंक तालिकाको पुछारमै रहेको छ भने मच्छिन्द्र क्लब १२ औं स्थानमा रहेको छ । एनआरटीले १२ खेलबाट ६ अंक जोड्दा मच्छिन्द्रको भने ७ अंक भएको छ ।
ए डिभिजन लिगअन्तर्गत आज हुने अन्य खेलहरुमा जावलाखेल युथ क्लबले त्रिभुवन आर्मी क्लबसंग तथा फ्रेन्ड्स क्लबले ब्रिगेड ब्वाइजसंग खेल्दैछन् ।
लिगमा एघारौं चरणको खेल सकिदै मनाङ मस्र्याग्दी क्लब च्याम्पियन बनिसकेकोले अब दोस्रो स्थानका लागि घम्साघम्सी भईरहेको छ ।
१४ टिम सहभागी लिगमा ११ खेलबाट च्याम्पियन बनेको मनाङले ३३ अंक जोडेको छ ।
दोस्रो स्थानको लागि भने संकटा क्लब, थ्रीस्टार क्लब र आर्मीबिच भिडन्त जारी छ । संकटाको २५, थ्रीस्टारको २३ तथा आर्मीको २१ अंक रहेको छ ।
