रुस, पुस-१८ ।
रुसको मध्यभागमा रहेको मग्नितागोस्र्क सहरको एक भवनामा गत सोमबार भएको बिस्फोटपछि भग्नावशेषमा पुरिएकाहरुलाई खोज्ने क्रममा ११ महिने बालकको जिवितै उद्धार गरिएको छ ।
तापक्रम माइनस १७ पुगेको अवस्थामा पनि इवान नामका ती बालकलाई जिउँदै उद्धार गर्न उद्धारकर्मीहरु सफल भएका हुन ।
भग्नावशेष पन्छाउने क्रममा रुँदै गरेको बालकलाई उद्धारकर्मीहरुले भेटेका हुन् ।
बालकको टाउकोमा सामान्य चोट लागेको छ भने हात र खुट्टा भाँचिएको छन । उनलाई थप उपचारको लागि मस्कोको एक अस्पतालमा भर्ना गरिएको जानाईएको छ ।
गत सोमबार भएको बिस्फोटमा चारजनाको ज्यान गएको थियो भने विस्फोटका कारण भवनका ४८ वटा फ्ल्याटहरु ध्वस्त भएका थिए ।
अझै ३६ भन्दा बढी बेपत्ता रहेको त्यहाँका अधिकारीहरुले जनाएका छन् । भवनमा लगभग १२० जना बस्दै आएका थिए ।
राष्ट्रपति पुटिनले विस्फोटका कारण प्रभावितलाई सबै प्रकारको सहयोग गर्ने बताएका छन । विस्फोट भने भवनको पहिलो तलामा भएको थियो ।
विस्फोट ग्यास लिक भएर भएको सरकारी अधिकारीले जनाएका छन् ।
(एजेन्सी)
