केरला, पुस- १८ ।
भारतको केरला राज्यस्थित सबरीमला मन्दिरमा बुधबार दुई महिलाले प्रवेश गर्दै सदियौ पुरानो परम्परालाई तोडेका छन् । १० देखि ५० वर्षबीचको उमेर समूहका महिलाहरुलाई प्रवेश निषेध गरिएको सो मन्दिरमा सोही उमेर समूहका दुई महिला प्रवेश गर्दै उनिहरुले उक्त परम्परा तोडेका हुन् ।
केही समय अघि भारतको सर्वोच्च अदालतले मन्दिरमा महिलालाई प्रवेश निषेध गर्ने उक्त परम्परा उपयुक्त नभएको भन्दै कसैलाई मन्दिर प्रवेशबाट रोक्न नहुने फैसला समेत गरेको थियो । सोही फैसलालाई आधार बनाएर केरलाका दुई महिला मन्दिरभित्र प्रवेश गरेको जनाईएको छ ।
मुख्यमन्त्री पी विजयनले समेत महिलाहरु मन्दिरमा प्रवेशको पुष्टि गरे । उनले ती महिलाहरुलाई सुरक्षा व्यबस्था उपलब्ध गराइएको समेत जनाए ।
स्थानीयवासीले भने महिलालाई मन्दिरमा प्रवेश गराउने प्रयासको विरोध जनाउदै आएका थिए । उनीहरुले यसअघि बारम्बार मन्दिर प्रवेशका लागि महिलाहरुको समूहद्वारा हुँदै आएको प्रयासलाई विफल तुल्याउदै आएका थिए । बुधबार बिहानै दुई महिलाले कडा सुरक्षाबीच मन्दिर प्रवेश गरेको अधिकारीहरुको भनाइ रहेको छ ।
मन्दिरमा अयप्पाको मूर्ति छ । अयप्पा ‘ब्रम्हचारी’ भएका कारण मन्दिरमा महिलालाई प्रवेश निषेध गरिएको स्थानीयवासी बताउँछन् । पौराणिक कथाअनुसार भगवान शिव र मोहिनी (विष्णु भगवानको अवतार) का पुत्रका रुपमा अयप्पाको जन्म भएको जनविश्वास रहदै आएको छ । अयप्पालाई हरिहरपुत्र रुपमा समेत लिने गरिन्छ ।
मन्दिरमा दुई महिला प्रवेश गरेलगत्तै मुख्य पुजारीले मन्दिर बन्द गरेका छन् । मन्दिर शुद्धिकरणका लागि बन्द गरिएको उनले बताएका छन ।
भारतीय संचारमाध्यमका अनुसार बिन्दु र कनकदुर्गा नाम गरेका दुई महिलाले उक्त मन्दिर प्रवेश गरेका हुन् । उनीहरुले भगवान अयप्पाको दर्शन गरेको जनाइएको छ ।
(एजेन्सी)
