पोखरा, गण्डकी। नेपाली भक्ति संगीतको इतिहासमै सबैभन्दा ठूलो लगानीमा निर्माण गरिएको “जय श्रीराम” भजन भिडियो यही शुक्रबार पोखरास्थित गण्डकी कोटिहोममा एक विशेष समारोहबीच सार्वजनिक गरिँदैछ। भक्ति, भावनात्मकता र सौन्दर्यको संगम भएको यो भजनले नेपाली संगीत क्षेत्रमा अध्यात्मको नयाँ स्वाद थप्ने विश्वास गरिएको छ।
भजनका शब्द, संगीत तथा निर्देशन आरबी केसीले गरेका हुन्। प्रमुख स्वरमा विष्णुमाया पौडेल र शेरबहादुर विसीको आत्मस्पर्शी गायन रहेको छ भने हेमन्त भट्टराई र आरबी केसीसहितको कोरसले गीतलाई गहिरो भावनात्मक उचाइमा पुर्याएको छ। पिक स्टुडियोमा उच्च प्रविधिबाट रेकर्ड गरिएको यस भजनले गुणस्तरीय भक्ति संगीतको नयाँ मानक तय गरेको निर्माण पक्षको भनाइ छ।
भिडियोमा अभिनेता कमल ढकाल मुख्य भूमिकामा प्रस्तुत छन्। उनलाई काठमाडौंका मेयर बालेनसँग तुलना गर्दै एउटा आध्यात्मिक जागरणको प्रतिनिधि पात्रको रूपमा देखाइएको छ। उनको अभिनयले भजनमा समर्पण, जागरण र सामाजिक संदेश सशक्त रूपमा अभिव्यक्त गर्छ।
भिडियोको छायांकन पोखरा, काठमाडौं र जनकपुरका विभिन्न धार्मिक तथा सांस्कृतिक स्थलहरूमा तीन दिनसम्म रेड क्यामराद्वारा गरिएको हो। सम्पादन टेकेन्द्र शाहले गरेका छन् भने कोरियोग्राफी एसके श्रेष्ठको रहेको छ। निर्देशन आरबी केसी आफैंले गरेका हुन्।
भजनको अडियो केही दिनअघि नै गण्डकी कोटिहोममा आयोजित एक कार्यक्रममार्फत सार्वजनिक गरिएको थियो, जसमा विजयकृष्ण मूर्ति महाराज र अन्तर्राष्ट्रिय श्रीमद्भागवत कथा वाचिका देवी प्रतिभा विशेष अतिथिको रूपमा उपस्थित थिए। ती ऐतिहासिक दृश्यहरू पनि भिडियोमा समावेश छन्, जसले भजनको गहिराइ र प्रभावकारिता अझ बढाएको छ।
शुक्रबारको सार्वजनिक कार्यक्रममा गीतकार, संगीतकार, गायक/गायिका, निर्देशक, कलाकार, सञ्चारकर्मी, धर्मप्रेमी तथा श्रद्धालुहरूको उल्लेखनीय सहभागिता रहनेछ। निर्माण पक्षका अनुसार, “जय श्रीराम” केवल गीत नभएर श्रीरामप्रतिको प्रेम, श्रद्धा र जीवनदर्शनको एक दिव्य अभिव्यक्ति हो।
शुक्रबार जाऔं गण्डकी कोटिहोम — भक्ति र भावनाको ऐतिहासिक क्षण साक्षी बन्न।
