डडेल्धुरा, पुस- २३ ।
डडेल्धुरा जिल्ला सदरमुकामको अमरगढी नगरपालिका–५ को बागबजारमा गएराति भिषण आगलागी भएको छ ।
बागबजारस्थित बगरकोटमा गएराति भएको आगलागीमा ९ वटा पसल जलेर पूर्णरुपमा नष्ट भएको जिल्ला प्रहरी कार्यालय डडेल्धुराले जनाएको छ ।
केहि समयअघि पनि बागबजारमा पटकपटक आगलागी भएको थियो । उक्त स्थानमा लगातार आगलागी हुन थालेपछि स्थानीय भने त्रसित हुन थालेका छन् ।
गएराति भएको आगलागी भने अमरगढी नगरपालिकाको दमक, नेपाल प्रहरी, सशस्त्र प्रहरी, नेपाली सेना र स्थानीयको सहयोगमा दुई घण्टापछि नियन्त्रणमा लिइएको थियो ।
प्रहरीले आगलागीको घटनामा संलग्न रहेको भन्दै एक जनालाई पक्राउ गरेको छ । पक्राउ पर्नेको नाम भने प्रहरीले अहिलेसम्म सार्वजनिक गरेको छैन ।
पक्राउ परेका व्यक्तिले आफ्नो कसुर स्वीकार गरिसकेको प्रहरी नायव उपरीक्षक डम्बरबहादुर केसीले जनाए । उनका बारेमा विस्तृत छानबिन भइरहेको प्रहरीले बताएको छ ।
