त्रिभुवन अन्तर्राष्ट्रिय विमानस्थल अध्यागमन कार्यालय, गृह मन्त्रालयअन्तर्गत अध्यागमन विभागले नेपालबाट विदेश जान तयारीमा रहेका सबै यात्रु, टुर गाइड, ट्राभल एजेन्ट तथा विमानस्थलमा क्रियाशील कम्पनीहरूलाई लक्षित गर्दै विशेष सूचना जारी गरेको छ।
विमानस्थलको सुरक्षालाई थप व्यवस्थित, सहज र प्रभावकारी बनाउने उद्देश्यले जारी गरिएको सूचनामा अध्यागमन क्षेत्रभित्र कसैलाई पनि खादा, माला, चस्मा, फरक प्रकारका टोपी, वा कुनै विशेष पहिचान वा संकेत झल्काउने वस्तु (Accessories) प्रयोग नगर्न आग्रह गरिएको छ।
दुई मुख्य प्रतिबन्ध
१. खादा, माला वा शोभा प्रकृतिका वस्तुहरू निषेध
-
अध्यागमन काउन्टर वरपर वा प्रक्रियाको क्रममा यस्ता वस्तुको आदानप्रदान गर्न नपाइने।
-
यसले यात्रुको स्पष्ट पहिचानमा अवरोध ल्याउने तथा सुरक्षा संवेदनशीलता बढाउने भएकाले यस्ता वस्तुहरू अध्यागमन क्षेत्रमा प्रयोग गर्न निषेध गरिएको हो।
२. टोपी वा अन्य विशेष वस्त्र प्रयोग नगर्न निर्देशन
-
कुनै संस्थागत समूह, संघ–संस्था वा ट्राभल कम्पनीहरूले लगाउने विशेष पोशाक वा टोपीले यात्रुहरूको भिन्न पहिचान झल्किने हुनाले त्यस्ता पोशाक र चिन्हहरू प्रयोग नगर्न स्पष्ट निर्देशन दिइएको छ।
अवैध गतिविधिमा संलग्नता भए कानुनी कारवाही हुने चेतावनी
अध्यागमन कार्यालयले नियमको उल्लंघन गर्नेहरूलाई कानुनी कारवाहीको भागेदार बनाइने भन्दै सबै सरोकारवालालाई सचेत गराएको छ। साथै, अध्यागमन प्रक्रिया सहज बनाउनका लागि यात्रुहरू, ट्राभल व्यवसायी तथा सम्बन्धित निकायहरूलाई पूर्ण सहकार्य गर्न समेत अनुरोध गरिएको छ।
सूचनाको अन्त्यमा, कार्यालयले यात्रुहरूको सहुलियत र सुरक्षालाई उच्च प्राथमिकता दिँदै यस्तो व्यवस्था लागू गरिएको जनाएको छ।
