काठमाडौं, पुस-२५ ।
तेह्रथुम जिल्लाको धार्मिक तथा पर्यटकीय स्थल चिचिलिङ पोखरीमा सडक विस्तारसँगै सवारी साधन सञ्चालनमा आउन थालेका छन् ।
फेदाप गाउँपालिकाको केन्द्र पोक्लाबाङदेखि चिचिलिङ पोखरीसम्म सडक विस्तार भएपश्चात सवारी साधन सञ्चालनमा आउन थालेका छन ।
तेह्रथुम सदरमुकाम म्याङलुङबाट लगभग एक दिनको पैदल दूरीमा अग्लो डाँडाबीच रहेको यो पोखरी दृश्यावलोकन गर्ने र वनभोज खाने स्थलको रुपमा परिचित हुँदै गएको छ ।
अहिले सडक निर्माणका कारण यो क्षेत्र आन्तरीक पर्यटकको निम्ति समेत आकर्षक गन्तव्य बन्दै गएको छ ।
पोखरी परिसरसम्म पुग्न गाउँपालिकाको केन्द्र पोक्लाबाङदेखि भ्यागुत्ते ढुंगासम्मको ४.२ किमी सडक निर्माण सम्पन्न भएको हो ।
यहाँ घुम्न आउन चाहने पर्यटकलाई सहज होस् भनेर ट्रयाक ओपनसँगै ७ मिटर चौडाईको सडक निर्माण गरिएको फेदाप गाउँपालिकाका अध्यक्ष हरि चोङवाङले जनाएका छन ।
