Logo
21 Feb 2024    ९ फाल्गुन २०८०, बुधबार

ताजा खबर

क्यानडा–११ माथि नेपाल ए २ विकेटले विजयी सूर्यदर्शन सहकारी ठगी : रवि लामिछानेमाथि अनुसन्धान अघि बढाइयो गायक सौगात र गायिका सुरक्षाको स्वरमा ‘तिम्रो मिठो मुस्कान’ सार्वजनिक(भिडियो) सिटी पे र एप्क्यानबीच व्यवसायीक सहकार्य गर्ने सम्झौता एक किलो सुनसहित विमानस्थलबाट एक जना पक्राउ विष्णुमति नदी आसपासमा अवैध रुपमा निर्माण गरिएका संरचना हटाउन सुरु

वैशाखदेखि पाइपलाइनमार्फत् भारतबाट नेपालमा पेट्रोलियम पदार्थ आउने

admin

Pipeline

वीरगन्ज, पुस-३०।

दक्षिण एसियाकै पहिलो ‘क्रस बोर्डर’ परियोजनाकारुपमा रहेको मोतिहारी–अमलेखगन्ज पेट्रोलियम पाइपलाइनमार्फत् भारतबाट नेपालमा पेट्रोलियम पदार्थ वैशाखदेखि ल्याउने सुनिश्चित भएको छ ।

सो परियोजना भारतको मोतिहारीदेखि बाराको अमलेखगन्जसम्म करिब ७० किलोमिटर लम्बाइको छ ।

तीमध्ये भारततर्फ मोतिहारीदेखि रक्सौलसम्म ३२.२५ किलोमिटर र सीमावर्ती भारतीय सहर रक्सौलबजारदेखि बाराको अमलेखगन्जसम्म ३७.२५ किमि छ ।

परियोजनाअन्तर्गत् पाइप बिछ्याउने काम द्रुतगतिमा भइरहेकाले वैशाखदेखि पाइपलाइन सन्चालनमा आउने परियोजना कार्यालय सिमराले जनाएको छ ।

नेपालतर्फ ३७.२५ किलोमिटर भू–भागमध्ये गन्डकदेखि परवानीपुरसम्म करिब एक किमि र पर्सा राष्ट्रिय निकुञ्जको ९ किमि गरी कुल १० किमि भू–भागमामात्र पाइपलाइन ओछ्याउन बाँकी रहेको परियोजना कार्यालय सिमराका इन्जिनियर शरदप्रसाद पौडेलले बताए ।

भारत, विहारको राजधानी पटना हुँदै सिवान र मोतिहारीदेखि रक्सौलसम्म पाइपलाइन आउने भएकाले सो क्षेत्रमा करिब चार किमि पाइप ओछ्याउने काम बाँकी रहेको छ भने सीमावर्ती भारतको रक्सौलदेखि सिर्सिया नदीमा पाइप छिराइ वीरगन्ज भन्सारको शंकराचार्य गेटसम्म ल्याउने काम भइरहेको बताइएको छ ।

नेपाल–भारत दुवै सरकारको प्राथमिकतामा रहेको सो परियोजना भारतीय आयल कर्पोरेसन (आइओसी)को दुई अर्ब भारतीय रुपैयाँभन्दा बढीको लागतमा निर्माण भइरहेको छ ।

परियोजनाले सन् २०१९ को फेब्रुअरीसम्म पाइप गाड्ने काम सम्पन्न गरिसक्ने लक्ष्य लिएको छ ।

जितपुर तथा परवानीपुरको केही भू–भागमा जमिनमुनि दुलो पारेर (ड्रिलिङ प्रविधिबाट) पाइप गाडिएको छ । यो प्रविधिबाट सडकको पैदलमार्ग (फुटपाथ)को ठीक तल जमिनमुनि ८ देखि १६ मिटरसम्म पाइप गाडिएको छ ।

पूर्व–पश्चिम राजमार्गको सडकखन्डमा पर्सा राष्ट्रिय निकुञ्ज पर्ने भएकाले त्यस भेगका करिब ६ हजार ५०० ठूला तथा चार हजारजति साना रुख काट्नुपर्ने देखिन्छ ।

परियोजनाले सुरुमा भारतीय सीमावर्ती बजार रक्सौलबाट पाइप ल्याउने भनिएपनि अहिले विस्तार भएर मोतिहारीसम्म पुगेकाले काम बढ्न गएको हो ।

भारतीय आयल कर्पोरेसनले मोतिहारी डिपोलाई पूर्णरुपले बनाइ नसकिएकाले केही ढिलो भएको प्राविधिकको भनाइ छ ।

पहिलो चरणमा १९० किलोलिटर प्रतिघन्टाका दरले विहारको राजधानी पटनाबाट डिजेल आउनेछ ।

तर, मोतिहारी डिपो सन्चालनमा आएपछि प्रतिघन्टा २०० किलोलिटर डिजेल अमलेखगन्ज डिपोमा भन्डारण हुनेछ ।

भारतीयपक्षले सन् २०१९ सम्म मोतिहारी डिपोको निर्माण सम्पन्न गरिसक्ने लक्ष्य लिएको छ ।

मल्टी प्रोजेक्ट पाइपलाइन भएकाले यसबाट डिजेल, पेट्रोल र मट्टितेलसमेत आयात हुनेछ । परियोजना सन्चालनमा आएपछि सुरुमा डिजेलमात्र आयात गरिनेछ ।

मागको करिब ६० प्रतिशत डिजेल पाइपबाट नेपाल भित्रिने नेपाल आयल निगमले जनाएको छ ।

मोतिहारी–अमलेखगन्ज पेट्रोलियम पाइपलाइन सन्चालनमा आएपछि नेपाललाई निकै आर्थिक लाभ हुने यहाँका व्यापारीको भनाइ छ ।

यसबाट वीरगन्ज नाका तथा भन्सार क्षेत्रमा हुने लामो जाम र भीड अन्त्य हुने तथा वीरगन्ज–पथलैया सडकखन्डमा हुने ट्यांकरको चाप पनि घटेर जाने विश्वास लिइएको छ ।

नेपालमा आयात हुने कुल पेट्रोलियम पदार्थमध्ये ५० प्रतिशत हिस्सा वीरगन्ज नाकाबाट भित्रिने भएकाले पनि पाइपलाइन सन्चालनमा आएपछि सहज हुने विश्वास लिएको छ ।

नेपाल आयल निगमले अहिले भारतको बैरगनिया र रक्सौलस्थित भारतीय आयल कर्पोरेसनको डिपोबाट पेट्रोलियम पदार्थ पेट्रोल, डिजेल, मट्टितेल, हाइस्पीड डिजल र हवाई इन्धन ट्यांकरमार्फत् अमलेखगन्ज डिपोमा आयात गर्दै आएको छ ।

मोतिहारी–अमलेखगन्ज पेट्रोलियम पाइपलाइन सन्चालनमा आएपछि भारतको डिपोबाट प्रतिघन्टा दुई लाख लिटर इन्धन अमलेखगन्ज डिपोमा ल्याउने लक्ष्य नेपाल आयल निगमले लिएको छ ।

सरकारले मोतिहारी–अमलेखगन्ज पाइपलाइनलाई भविष्यमा विस्तार गरी चितवनसम्म लैजाने लक्ष्य लिएको छ ।

करिब १४ वर्षअगाडि सन् २००४ मा नेपाल आयल निगम र भारतीय आयल कर्पोरेसनबीच भएको समझदारीअनुसार पाइपलाइनमार्फत् नेपालमा सीधै पेट्रोलियम पदार्थ ल्याउने उद्देश्यसहित परियोजनाले गति लिएपनि खासै प्रगति भने देखिएको थिएन ।

पाँच वर्षअघि भारतीय प्रधानमन्त्री नरेन्द्र मोदीले पहिलोपटक नेपाल भ्रमण गर्दा तत्कालीन संविधानसभामा पाइपलाइन परियोजनालाई अघि बढाउने भनेपछि यो परियोजनाले गति लिएको हो ।

प्रधानमन्त्री केपी शर्मा ओलीको गत चैतमा भएको भारत भ्रमणकाक्रममा नयाँदिल्लीको हैदरावाद हाउसबाट भारतीय प्रधानमन्त्री नरेन्द्र मोदी र प्रधानमन्त्री ओलीले संयुक्तरुपमा शिलान्यास गरेपछि सो परियोजनाले गति लिएको हो ।

अहिले नेपालतर्फ वीरगन्ज भन्सारको शंकराचार्यद्वारनजिक पाइपलाइन निर्माणका लागि खाल्डो खनेर जमिनमुनि पाइप बिछ्याउने काम भइरहेको छ ।
(रासस)


लोकप्रिय समाचार
ताजा समाचार
धेरै पढिएको