कैलाली, पुस-३० ।
सुदूरपश्चिम खप्तड गोल्डकप फुटबल प्रतियोगितामा च्यासल युथ क्लबलाई हराउँदै थ्रीस्टार क्लब सेमिफाइनलमा प्रवेश गरेको छ ।
धनगढी रंगशालामा सोमबार भएको क्वार्टरफाइनल खेलमा थ्रीस्टारले च्यासललाई १–० ले पराजित गर्दै अन्तिम चारमा स्थान पक्का गरेको हो ।
पहिलो हाफ गोलरहित रहेको खेलमा थ्रीस्टारलाई जित दिलाउने क्रममा खेल सकिन तीन मिनेट समय बाँकी छँदा रुपेश केसीले गरेको एकमात्र गोल निर्णायक बन्यो ।
सुनील बलको क्रसमा रुपेशले हेडमार्फत् गोल गरेका थिए ।
थ्रीस्टारको जितमा निर्णायक गोल गरेक रुपेश नै ‘म्यान अफ दी म्याच’ घोषित भए । उनले १० हजार रुपैयाँ प्राप्त गरे ।
थ्रीस्टारले अब फाइनल प्रवेशका लागि बुधबार मेची नेत्रालय काँकडभिट्टा फुटबल ट्रेनिङ सेन्टरसंग प्रतिस्पर्धा गर्नेछ ।
मंगलबार हुने अन्तिम क्वार्टरफाइनलमा भने संकटा क्लबले क्यामरुनको दाफिनास एफसीसंग भिड्दै छ ।
