काठमाडौं – देशमा विद्यमान विषम परिस्थितिलाई मध्यनजर गर्दै नेपाली सेनाले आज (भाद्र २५ गते) बेलुका ५ बजेसम्म देशभर निषेधाज्ञा र त्यसपछि भोलि (भाद्र २६ गते) बिहान ६ बजेसम्म कर्फ्यु लागू हुने जानकारी दिएको छ। सेनाले आवश्यक परे थप सूचना प्रदान गरिने पनि जनाएको छ।
नेपाली सेनाले आन्दोलनका क्रममा भएका जनधनको क्षति र अपराधजन्य गतिविधिप्रति गहिरो दुःख व्यक्त गर्दै सबै नागरिकलाई सहयोग र संयमित व्यवहारको अपिल गरेको छ।
सेनाका अनुसार आन्दोलनको आडमा अराजक व्यक्ति र समूहले घुसपैठ गरी तोडफोड, आगजनी, लुटपाट, हिंसा र बलात्कारका प्रयास जस्ता गतिविधि गरेका वा गर्न सक्ने सम्भावना रहेकोले निषेधाज्ञा र कर्फ्यु लागू गरिएको हो।
निषेधाज्ञा र कर्फ्युको समयमा एम्बुलेन्स, शव वाहन, दमकल, स्वास्थ्यकर्मी र सुरक्षाकर्मीका सवारी साधन भने सञ्चालनमा रहिरहनेछन्। आवश्यक परे नजिकका सुरक्षाकर्मीसँग समन्वय गर्न नागरिकलाई सेनाले अनुरोध गरेको छ।
नागरिकलाई सन्देश
-
आन्दोलनको नाममा हुने तोडफोड, लुटपाट, आगजनी वा आक्रमण दण्डनीय अपराध मानिनेछ।
-
अफवाहमा नपरेर केवल आधिकारिक सूचनामा विश्वास गर्न।
-
राष्ट्रिय एकता र सामाजिक सद्भाव कायम राख्दै जनजीवन सामान्य बनाउन आ-आफ्नो दायित्व निभाउन।
नेपाली सेनाले हरेक परिस्थितिमा जनताको सुरक्षा र मानवीय उद्धारमा प्रतिबद्ध रहेको विश्वास दिलाएको छ।
