देशव्यापी जेन–जी आन्दोलनपछि राष्ट्रपति रामचन्द्र पौडेल पूर्वप्रधानन्यायाधीश सुशीला कार्कीलाई प्रधानमन्त्री बनाउन तयार भएका छन्। तर संसद् विघटनबिना गैरसांसदलाई प्रधानमन्त्री बनाउन सकिने कि नसकिने भन्ने संवैधानिक विवादमा शीतल निवासमा संविधानविद्हरूसँग निरन्तर परामर्श भइरहेको छ।
वार्तामा सहभागी स्रोतका अनुसार कार्कीले पहिले संसद् विघटन अनिवार्य भन्ने अडान राखेकी छन्, भने राष्ट्रपति पौडेल विघटन नगरी नियुक्ति सम्भव छ कि छैन भन्ने विकल्प खोजिरहेका छन्। बिहीबार राति मध्यरातसम्म टुंगो नलागेपछि शुक्रबार बिहान पुनः छलफल गर्ने तयारी भएको छ।
संविधानविद्हरूले धारा ६१ (४) (राष्ट्रपतिको संवैधानिक कर्तव्य) र धारा ३०५ (संविधान कार्यान्वयनमा अवरोध हटाउने अधिकार) को व्याख्या गर्दै सम्भावित निकासबारे सुझाव दिएका छन्।
जेन–जी आन्दोलनमा ३० भन्दा बढीले ज्यान गुमाएपछि र हजारभन्दा बढी घाइते भएपछि प्रधानमन्त्री केपी ओलीले राजीनामा दिएका थिए। त्यसपछि नयाँ सरकार गठनका लागि राष्ट्रपतिले पहल गरेका हुन्। अहिले देशको सुरक्षा नेपाली सेनाको समन्वयमा अन्य निकायहरूले सम्हालेका छन्।
