राइडिङ सेयरिङ एप्सहरूलाई साविकको भन्दा महँगो भाडा नलिन जिल्ला प्रशासन कार्यालय, काठमाडौंले आग्रह गरेको छ ।
पठाओ, इन्ड्राइभ, यांगो लगायतका राइड सेयरिङबाट यात्रुहरू ठगिएको गुनासो आएको भन्दै प्रशासनले यस्तो कार्य नगर्न आग्रह गरेको हो ।
जिल्ला प्रशासन कार्यालय काठमाडौंका प्रशासकीय अधिकृत सुजन कुमारी बर्देवाले विज्ञप्ति जारी गर्दै यस्तो आग्रह गरेकी हुन् ।
त्यस्तै, कसैले यस्ता किसिमका ठगी गरेको पाइए प्रमाणसहित प्रशासन कार्यालयमा पेश गर्न पनि आग्रह गरिएको छ ।
ठगी गर्नेहरूलाई प्रचलित कानुन अनुसार कडा कारबाही हुने प्रशासनले जनाएको छ । विमानस्थल बन्द भएसँगै उक्त क्षेत्रमा महँगो दर लगाएपछि यात्रुहरू समस्यामा परेका छन् ।
अविरल परेको वर्षाका कारण देशभरको जनजीवन प्रभावित बनेको छ । विभिन्न राजमार्गहरू अवरुद्ध बनेका छन् ।
सरकारले भोलि र पर्सि सार्वजनिक बिदा समेत दिइसकेको छ । मनसुन अझै दुई दिन सक्रिय हुने बताइएको छ ।
