काठमाडौं । निवर्तमान प्रधानमन्त्री केपी शर्मा ओली र तत्कालीन गृहमन्त्री रमेश लेखकविरुद्ध किटानी जाहेरी लिएर जेनजी मुभमेन्टका अगुवाहरू सोमबार जिल्ला प्रहरी परिसर, काठमाडौं पुगेका छन्।
जेनजी अगुवा सुदन गुरुङसहितको टोली दिउँसो जाहेरी दर्ता गर्न पुगेको भए पनि प्रहरीले जाहेरी नलिएर फर्काएको छ। प्रहरी स्रोतका अनुसार, जेनजी टोलीले २३ र २४ भदौमा भएको आन्दोलनमा ‘राज्यद्वारा गरिएको दमन’ को जिम्मेवारी माग गर्दै जाहेरी दर्ता गर्न खोजेका थिए।
तर, प्रहरी स्रोतले भन्यो,“उहाँहरू जाहेरी लिएर आउनुभएको थियो, केहीबेर छलफल पनि भयो। तर, अहिले न्यायिक छानबिन समिति गठन भइसकेको हुँदा जाहेरी दर्ता हुन सकेन।”
यसअघि, जेनजी आन्दोलनमा राज्यद्वारा निहत्था विद्यार्थीमाथि गोली चलाइएको भन्दै अगुवाहरूले सामाजिक सञ्जालमा ‘#ArrestKPOli’ नामक अभियान सुरु गरेका थिए। उनीहरूले ओली र लेखकलाई दमनको प्रत्यक्ष जिम्मेवार ठहर गर्दै कानूनी कारबाहीको माग दोहोर्याएका छन्।
