काठमाडौं । राजधानीस्थित नेपाल पुलिस क्लबमा भव्य रूपमा सम्पन्न ६औँ जिनियस म्युजिक अवार्ड २०८१ तथा एचिभमेन्ट अवार्ड २०२५ कार्यक्रमका क्रममा चर्चित नृत्य निर्देशक सन्दीप भुजेललाई ‘जिनियस कला सम्मान २०८२’ द्वारा सम्मान गरिएको छ।
कार्यक्रमका प्रमुख अतिथि बागमती प्रदेशका माननीय मुख्यमन्त्री इन्द्रबहादुर बानियाको विशेष आतिथ्यमा सम्पन्न सो समारोहले देशभरका संगीत, नृत्य तथा कला क्षेत्रमा सक्रिय व्यक्तित्वहरूलाई सम्मानित गरेको थियो।
लामो समयदेखि नृत्य क्षेत्रमा निरन्तर सक्रिय रहँदै आफ्नो सिर्जनात्मक कोरियोग्राफीमार्फत नेपाली मनोरञ्जन क्षेत्रमा नयाँ पहिचान स्थापित गर्न सफल फेमस डान्स कोरियोग्राफर सन्दीप भुजेलले प्राप्त सम्मानलाई आफ्नो पेशागत समर्पण र निरन्तर मिहिनेतको प्रतिफलको रूपमा लिएको बताउनुभयो। सम्मान ग्रहण पश्चात उहां भन्नुहुन्छ ,
“नृत्य क्षेत्रमा मैले गरेको योगदानको कदर गर्दै प्राप्त यो सम्मान मेरो लागि ठूलो गर्व र प्रेरणाको क्षण बनेको छ। यसले आगामी दिनमा अझ राम्रो काम गर्न हौसला प्रदान गरेको छ।”
सन्दीप भुजेलले विगत लामो समयदेखि नेपालका विभिन्न राष्ट्रिय तथा अन्तर्राष्ट्रिय सौन्दर्य प्रतियोगिता, डान्स शो तथा टेलिभिजन कार्यक्रमहरूमा कोरियोग्राफरको रूपमा महत्वपूर्ण योगदान दिँदै आउनुभएको छ।
उहाँले नृत्यलाई केवल मनोरञ्जनको माध्यम मात्र नभई एक व्यवस्थित, मर्यादित र सम्मानित पेशाको रूपमा स्थापित गर्न महत्वपूर्ण भूमिका खेल्दै आउनुभएको छ।
कार्यक्रम आयोजक रमेश पाठकको सभापतित्वमा सम्पन्न यस समारोहमा विभिन्न विधाका कलाकार, प्रतिष्ठित व्यक्तित्व, मिडिया प्रतिनिधि तथा नृत्यप्रेमीहरूको उल्लेखनीय उपस्थिति रहेको थियो।
