जबर्जस्ती करणी मुद्दामा मधेस प्रदेशका पूर्वप्रदेश प्रमुख राजेश अहिराजलाई पुर्पक्षका लागि थुनामा राख्ने जिल्ला र उच्च अदालतको आदेश सर्वोच्चबाट समेत सदर भएको छ।
अहिराजल पुर्पक्षका लागि थुनामा पठाउने जिल्ला अदालत काठमाडौँको निर्णय सदर गर्ने उच्च अदालत पाटनको आदेश बदर गर्न माग गर्दै कात्तिक २३ गते सर्वोच्चमा निवेदन दिएका थिए।
मुलुकी फौजदारी कार्यविधि संहिता २०७४ को दफा ७३ अनुसार अहिराजले दिएको निवेदनमा न्यायाधीश कुमार रेग्मी र नित्यानन्द पाण्डेय इजलासले तल्लो अदालतको आदेशलाई नै सदर गरेको सर्वोच्चका प्रवक्ता अर्जुनप्रसाद कोइरालाले जानकारी दिए।
जिल्ला अदालत काठमाडौँका न्यायाधीश पिताम्बर शर्माको इजलासले साउन १४ पुर्पक्षका लागि थुनामा पठाउने आदेश गरेको थियो। त्यसलाई उच्च अदालत पाटनले भदौ १२ गते न्यायाधीश लालबहादुर कुँवर र खडानन्द तिवारीको इजलासले सदर गरेको थियो।
नाबालिकालाई डेरामै गएर जबरजस्ती करणी गरेको अभियोग उनीमाथि लागेको छ।
