काठमाडौं उपत्यकाभित्र सञ्चालन हुने सबै लामो दूरीका रात्रि तथा दिवा सेवाका सार्वजनिक सवारी साधन अब अनिवार्य रूपमा तोकिएको बसपार्कबाट मात्रै छुट्नुपर्ने व्यवस्था लागू गरिएको छ । उपत्यकामा दिनानुदिन बढ्दो ट्राफिक जाम नियन्त्रण गर्ने उद्देश्यले उक्त व्यवस्था लागू गरिएको उपत्यका ट्राफिक प्रहरी कार्यालयले जनाएको छ ।
कार्यालयका प्रवक्ता तथा प्रहरी उपरीक्षक नरेशराज सुवेदीका अनुसार पछिल्ला दिनमा लामो दूरीका सवारी साधनले स्थानीय बसजस्तै जथाभावी सडक किनारमै यात्रु चढाउने र ओराल्ने गर्दा विशेषगरी ‘पिक आवर’मा ट्राफिक जाम चर्किएको थियो ।
‘राजधानीका सडकमा सवारी चाप अत्याधिक छ, त्यसमाथि लामो दूरीका गाडीहरूले नियम विपरीत बाटोमै रोकेर यात्रु चढाउने–झार्ने गर्दा जाम झनै बढेको देखियो । त्यसैले अब सबै गाडी तोकिएको बसपार्कबाट मात्र छुट्नुपर्ने व्यवस्था लागू गरिएको हो,’ प्रवक्ता सुवेदीले बताए ।
यसैगरी लामो दूरीका गाडीलाई दिइँदै आएको बाटो इजाजतपत्रको समेत पुनरावलोकन गर्नुपर्ने आवश्यकता देखिएकाले यस विषयमा सम्बन्धित निकायसमक्ष आवश्यक पहलका लागि अनुरोध गरिएको ट्राफिक प्रहरीले जनाएको छ ।
ट्राफिक नियम उल्लंघनकर्तालाई अनलाइन सचेतना कक्षा
ट्राफिक प्रहरीले सडक अनुशासन कडाइका साथ लागू गरिरहेको जनाएको छ । रातो बत्ती उल्लंघन गर्ने, जथाभावी लेन परिवर्तन गर्ने, तीव्र गतिमा सवारी चलाउने तथा मादक पदार्थ सेवन गरी सवारी साधन चलाउने चालकलाई अनिवार्य रूपमा सचेतना कक्षामा सहभागी गराइँदै आएको छ ।
चालकमा जिम्मेवार व्यवहार विकास गर्ने उद्देश्यले यी कक्षालाई अझ प्रभावकारी बनाउने योजना समेत अघि बढाइएको कार्यालयले जनाएको छ । यसैबीच सेवाग्राहीका लागि अनलाइन सचेतना कक्षा पनि सञ्चालनमा ल्याइएको छ ।
यस सेवाको प्रयोग गर्न मोबाइल एप प्रयोग गरिरहेका चालक तथा सेवाग्राहीले पहिले ‘इन्स्टल’ गरेको एप्लिकेसनलाई एक पटक ‘अनइन्स्टल’ गरी पुनः ‘इन्स्टल’ गर्नुपर्ने प्रवक्ता सुवेदीले जानकारी दिए । नयाँ प्रणालीमार्फत घरमै बसेर सचेतना कक्षा लिन सकिने भएकाले यसले सेवाग्राहीलाई थप सहजता दिने अपेक्षा गरिएको छ ।
