काठमाडौं । चर्चित गायक तथा संगीतकार सुभाष तिमसिनाको नयाँ गीत ‘बानी परेछ तिम्रो’ सार्वजनिक गरिएको छ। सामाजिक यथार्थमा आधारित यो गीतले श्रीमती र परिवारलाई छाडेर परदेशिनु पर्दाको पीडा र परदेशबाट बाकसमा फर्किनु पर्ने दर्दनाक नियतिलाई मार्मिक रूपमा चित्रण गरेको छ।
गीतमा सुभाष तिमसिना, विशाखा शाही ठकुरी र बसन्त वली बसन्तीको स्वर रहेको छ भने लेखराज गिरी र बसन्त वली बसन्तीको संगीत रहेको छ। गीतको मर्मअनुसार तयार पारिएको म्युजिक भिडियोमा बसन्त वली बसन्ती र बसन्ती वलीले सशक्त अभिनय गर्दै गीतलाई जीवन्त बनाएका छन्। भिडियोको निर्देशन झग्गु भण्डारीले गरेका हुन्।
पछिल्लो एक दशकदेखि निरन्तर नेपाली संगीत क्षेत्रमा सक्रिय रहेका तिमसिनाका ‘वीर नेपाली सेना’, ‘पिरै–पिर मलाई’, ‘खल्लो माया’, ‘केटा हो’ लगायतका गीतहरू दर्शक तथा श्रोता माझ अत्यन्तै लोकप्रिय छन्।
हाल गीत रेकर्डिङमा व्यस्त रहेका तिमसिनाका करिब आधा दर्जन नयाँ गीतहरू छिट्टै बजारमा आउने तयारीमा रहेको जानकारी पनि दिइएको छ।
