क्रिश्चियन धर्मका संस्थापक येशु ख्रीष्टको जन्मदिनको सम्झनामा आज विश्वभरका क्रिश्चियन धर्मावलम्बीहरूले ‘क्रिसमस डे’ श्रद्धा, उत्साह र उमंगका साथ मनाइरहेका छन् ।
विश्वासअनुसार दुई हजार २५ वर्षअघि डिसेम्बर २५ तारिखका दिन येशु ख्रीष्टको जन्म इजरायलको वेथलेहेममा भएको थियो । पवित्र आत्माबाट गर्भवती भई कुमारी मरियमबाट जन्म भएका येशु ख्रीष्टले मानव जातिलाई मुक्ति, प्रेम र शान्तिको सन्देश दिएको विश्वास गरिन्छ ।
नेपाल ख्रिष्टियन महासंघका अध्यक्ष सिबी गहतराजका अनुसार येशु ख्रीष्टले मानव समाजलाई तीन मुख्य खुसी—मुक्ति, प्रेम र शान्ति—दिएको मान्यताअनुसार क्रिश्चियन समुदायले क्रिसमसलाई प्रेम दिवस, शान्ति दिवस र मुक्ति दिवस का रूपमा मनाउँदै आएको छ । मानिसलाई प्रेम गर्न सिकाउन आएकाले प्रेम दिवस, शान्ति स्थापना गर्न आएकाले शान्ति दिवस र पापबाट मुक्ति दिन आएकाले मुक्ति दिवसका रूपमा यो दिन मनाइने गरिएको उनले बताए ।
विश्वका धेरै देशमा व्यापक रूपमा मनाइने क्रिसमस डे नेपालमा भने विसं २०६३ पछि नेपाल ख्रिष्टियन महासंघले औपचारिक महोत्सवका रूपमा मनाउन थालेको अध्यक्ष गहतराजको भनाइ छ ।
महासंघ मूल समारोह समितिको आयोजनामा आज दिउँसो ‘क्रिसमस महोत्सव २०८२’ आयोजना गरिएको छ । महोत्सवमा सरकारका प्रतिनिधि, विभिन्न सरोकारवाला निकायका अधिकारी, मानवअधिकारकर्मी तथा क्रिश्चियन समुदायका अगुवाहरूको उपस्थिति रहने जनाइएको छ ।
क्रिसमस डे का अवसरमा नेपालमा विसं २०६३ देखि २०७४ सम्म सार्वजनिक बिदा दिइएको थियो । विसं २०७५ देखि २०७७ सम्म भने क्रिश्चियन धर्मावलम्बीलाई मात्र बिदा दिइएको थियो । विसं २०७८ देखि पुनः सबै नागरिकलाई सार्वजनिक बिदा दिइँदै आएको छ ।
पछिल्लो समय नेपालका प्रमुख सहरका मुख्य स्थानहरू क्रिसमस ‘ट्रि’ र झिलिमिली बत्तीले सजाउने परम्परा बढ्दै गएको छ । विशेषगरी पर्यटकको आवागमन बढी हुने ठमेल, बौद्ध, पोखरा, सौराहा लगायतका क्षेत्रहरूमा क्रिसमसको रमझम बढी देखिने गरेको छ ।
नेपाल ख्रिष्टियन महासंघको दाबीअनुसार हाल नेपालमा करिब ३० लाख क्रिश्चियन धर्मावलम्बी र १३ हजारभन्दा बढी चर्च रहेका छन् ।
