नेपाली कांग्रेसका कार्यवाहक सभापति पूर्णबहादुर खड्काले आज आयोजना गर्ने भनिएको पत्रकार सम्मेलन स्थगित गरेका छन्।
कांग्रेसभित्र विशेष महाधिवेशनको पक्ष र विपक्षमा नेता–कार्यकर्ताहरू विभाजित भई विवाद उत्कर्षमा पुगेका बेला कार्यवाहक सभापति खड्काले पत्रकार सम्मेलन आयोजना गर्न लागेका थिए। पार्टी केन्द्रीय कार्यालय सानेपामा दिउँसो १ बजे पत्रकार सम्मेलन हुने जानकारी मुख्यसचिव कृष्णप्रसाद पौडेलले मिडियालाई दिएका थिए।
तर पछि मुख्यसचिव पौडेलले नै अर्को सूचना जारी गर्दै उक्त पत्रकार सम्मेलन स्थगित गरिएको जानकारी गराएका छन्। इतर समूहका नेता डा. शेखर कोइरालाको उपस्थितिमा पत्रकार सम्मेलन हुने प्रचारसमेत गरिएको थियो। यद्यपि, पत्रकार सम्मेलन एकाएक किन स्थगित गरियो भन्ने विषयमा आधिकारिक कारण खुलाइएको छैन।
यसअघि बिहीबार बसेको केन्द्रीय कार्यसम्पादन समिति बैठकले विशेष महाधिवेशन तत्काल अघि नबढाउन अपिल गर्ने निर्णय गरेको थियो।
