काठमाडौं — १४, माघ ।
नेपाली क्रिकेट टोलीसमक्ष इतिहासकै पहिलो एकदिवसीय सिरिज जित्ने अवसर जुरेको छ । नेपालले सोमबार युएईविरुद्ध अन्तिम एकदिवसीय खेल खेल्दै छ । युएई र नेपालबीचको एकदिवसीय सिरिज १–१ को बराबरी अवस्थामा छ । नेपालले युएईलाई हराएमा इतिहासमै पहिलोपटक एकदिवसीय सिरिज जित्नेछ । गत चैतमा एकदिवसीय विश्वकप छनोटमा सातौँ स्थानमा रहँदै नेपालले चार वर्षका लागि एकदिवसीय राष्ट्रको मान्यता प्राप्त गरेको थियो । नेपालले आफ्नो पहिलो एकदिवसीय सिरिज नेदरल्यान्डविरुद्ध खेलेको थियो, जुन १–१ को बराबरीमा टुंगियो ।
दुवैलाई जित्ने दबाब
आइसिसी क्रिकेट एकेडेमीमा तेस्रो खेल हुनेछ । यसमा नेपाल र युएईलाई सिरिज जित्नुपर्ने दबाब छ । प्रतियोगितासँगै आइसिसीले जारी गर्ने एकदिवसीय वरीयतामा फड्को मार्नका लागि नेपालले जित निकाल्नु आवश्यक छ । आइसिसीको एकदिवसीय वरीयतामा स्थान बनाउन कम्तीमा चार खेल खेल्नुपर्छ । यद्यपि, नेपालले आइसिसीको कोटा पूरा गरिसकेको छ । तर, वरीयतामा प्रवेश गरेसँगै स्थानसमेत सुधार्न नेपालले युएईलाई तेस्रो खेलमा हराउनुपर्नेछ । यता युएई पनि वरीयता सुधार्न नेपाललाई हराउने योजनाका साथ मैदानमा प्रवेश गर्नेछ ।
बलर उत्कृष्ट फर्ममा
दोस्रो खेललगत्तै नेपाली बलरले उत्कृष्ट फर्ममा रहेको प्रमाणित गरेका छन् । सन्दीप लामिछाने, सोमपाल कामी तथा कप्तान पारसले दुवै खेलमा उत्कृष्ट बलिङ गरेका छन् । सोमपाल नेपालका लागि एकदिवसीय खेलमा ५ विकेट लिने पहिलो बलर बनेका छन् । उनले तेस्रो खेलमा पनि यस्तै प्रदर्शन गर्ने अपेक्षा छ । यता सन्दीप नेपाली टोलीका सदाबहार बलर बनिसकेका छन् । आवश्यक पर्दा सन्दीपले नेपाललाई ‘ब्रेक’ दिलाउने गरेका छन् ।
पारस पनि विकेट कन्डिसनअनुसार बलिङ गर्न सिपालु छन् । युएईविरुद्धको दोस्रो खेल धेरै अर्थमा महत्वपूर्ण रह्यो । युवा ब्याट्सम्यान रोहितकुमार पौडेलले एकदिवसीय खेलमा कान्छो खेलाडीका रूपमा अर्धशतकीय इनिङ खेले । रोहितले आफू फर्ममा आएको संकेत गरेका छन् । ओपनर तथा उपकप्तान ज्ञानेन्द्र मल्ल दोस्रो खेलमा अर्धशतक बनाउन चुके । तर, लामो इनिङ खेल्ने आत्मविश्वास उनले जगाएका छन् ।
(नयाँ पत्रिका)
