काठमाडौँ — फागुन १७।
नेपालको लिग च्याम्पियन मनाङ मर्स्याङ्दीसहित ९ वटा ‘ए’ डिभिजन क्लबले क्लब लाइसेन्सिङको मान्यता प्राप्त गरेका छन् ।
एसियाली फुटबल महासंघ (एएफसी) ले मापदण्ड पुरा गरेका ९ क्लबलाई क्लब लाइसेन्सिङको मान्यता दिएको हो । क्लब लाइसेन्स पाउने क्लबहरुमा मनाङसहित थ्री स्टार क्लब, त्रिभुवन आर्मी क्लब, च्यासल युथ क्लब, मछिन्द्र फुटबल क्लब, हिमालयन शेर्पा क्लब, संकटा क्लब, सशस्त्र प्रहरीको एपीएफ टिम र नेपाल पुलिस क्लब छन् ।
१४ वटा क्लबले लाईसेन्सिङका लागि आवेदन दिए पनि ९ वटाले मात्रै पाएका हुन् । बाँकी ५ क्लबले मापदण्ड पूरा गर्न सकेनन् ।
क्लब लाईसेन्सिङ पाएका क्लबहरु एसियाली फुटबल महासंघ (एएफसी)ले आयोजना गर्ने कुनै पनि फुटबल प्रतियोगिता खेल्न योग्य भएका छन् ।
विश्व फुटबलको सर्वोच्च निकाय फिफाले सन् २०१८ सम्म सदस्य राष्ट्रका सबै क्लबमा अनिवार्य लाइसेन्स प्रणाली लागु गर्ने नीति लिएपछि नेपालका क्लबहरुले पनि प्रक्रिया अघि बढाएका थिए । क्लब लाइसेन्स प्राप्तिका लागि क्लबहरुले कम्तिमा १७ वटा मापदण्ड पूरा गरेको हुनुपर्छ । त्यसमा क्लबको मैदान, खेलाडी सम्झौता, प्रशिक्षक संख्या, मार्केटिङ, मिडिया व्यवस्थापक, आर्थिक योजनालगायतका शर्त पर्दछन् ।
(ईमेज खबर)
