प्रस्तोता समाज नेपालले नेपाली गीत संगीतको क्षेत्रमा योगदान पुराएका ४ जना अग्रजलाई सम्मान गर्ने भएको छ । रेडियो नेपालका प्रथम गायक हरि प्रसाद रिमाल , अर्का गायक बासुदेव मुनाल, गायक तथा संकलक कृष्ण सुधा ढुङगाना र गायक तथा संकलक मच्छेस्वर सापकोटालाई नगद १० हजार र दोसल्लाले सम्मान गर्ने निर्णय गरेको हो । समाजमा संकलीत रोयल्टी ब्यबस्थापन बापतको प्रशासनिक खर्च बाट अग्रजहरुलाई रोयल्टी बापतको प्रसादी सम्मान भएको समाजले जनाएको छ । सबै क्षेत्रबाट रोयल्टी संकलन हुदाँ यसप्रकारको सम्मानको राशी बढदै जाने पनि समाजले जनाएको छ ।
मंगलवार राजधानीमा एक बिशेष कार्यक्रमको आयोजना गरी सम्मान अर्पण गरिने समाजका अध्यक्ष तुलसी पराजुलिले जानकारी दिएका छन । कार्यक्रममा पत्रकारीताको माध्यमबाट नेपाली गीत संगीतको प्रबद्र्धन , स्रष्टा अधिकार र रोयल्टीका बिषयमा सचेतना जगाएको भन्दै पत्रकार लोकराज अधिकारीलाई पनि सम्मान गर्ने समाजले निर्णय गरेको छ । अधिकारीलाई कदर पत्र र दोसल्लाले सम्मान गरिने समाजले जनाएको छ ।
संस्कृति मन्त्रालयका सचिव महेस्वर न्यौपानेको प्रमुख आतिथ्यमा कमलादिमा हुने कार्यक्रममा ५० जना प्रस्तोतालाई रोयल्टी बितरण पनि गरिने छ । यसपटक एक जना प्रस्तोताको भागमा अधिकतम २ लाख ४८ हजार रुपैया सम्म रोयल्टी आएको अध्यक्ष पराजुलिले जानकारी दिएका छन ।
