नेपाल आयल निगमले जग्गा खरिद प्रकरण अर्बौं रुपैयाँ घोटालामा मुछिएका कार्यकारी निर्देशक गोपालबहादुर खड्कालाई कारवाही गर्न आपूर्ति मन्त्रालयका सचिव कृष्ण देवकोटाले सिफारिस सहितको प्रतिवेदन मन्त्रालयमा बुझाएका छन् । मन्त्रालयले जग्गा खरिदबारे अध्ययन गर्न नियम सञ्चालक समितिका अध्यक्ष समेत रहेका सचिवलाई निर्देशन दिएको थियो । जग्गा खरिद प्रकरणमा बदनियत प्रष्ट देखिएको भन्दै आपूर्ति सचिवको प्रतिवेदनमा खड्कालाई कारवाही गर्न सिफारिस गरिएको छ । खड्कालाई आयल निगममा राखिरहँदा थप क्षति हुने देवकोटाले प्रतिवेदनमा उल्लेख गरेका छन् । संसदीय समितिहरुले समेत जग्गा खरिदमा अनियमिता भएको ठहर गर्दै दोषीलाई कारबाही गर्न निर्देशन दिइरहेका बेला मन्त्रालयकै सचिवले नै कारवाही सिफारिस गरेपछि आपूर्तिमन्त्री मण्डल नैतिक दबावमा परेका छन् । निर्दोष कोही पनि नपरोस् भनेर मात्र आफूले हतारमा कुनै निर्णय नगरेको भन्दै उनले दोषी देखिएकालाई कारबाही गर्न आफू कुनै हालतमा पछि नहट्ने बताएका छन् ।
