युनिकोड
पात्रो
शुक्रवार, आश्विन १६ गते २०८३
मंगलवार, श्रावण २६ २०८३०९:५३
पश्चिमी कोलम्बियाको पेरेरा सहरमा सोमबार बिहान गएको शक्तिशाली भूकम्पका कारण केबलकार (एरियल केबलकार) मा फसेका १६ जना यात्रुको करिब ६ घण्टापछि सकुशल उद्धार गरिएको छ।
पेरेरा नगरप्रमुखको कार्यालयद्वारा जारी वक्तव्य अनुसार सोमबार बिहान भूकम्प जाँदा यात्रुहरू केबलकारको डिब्बा (क्याबिन) भित्रै थिए।
उनीहरूलाई स्थानीय समय अनुसार दिउँसो १:३० बजेतिर सुरक्षित रूपमा बाहिर निकालिएको हो। सुरक्षा जाँच नसकिएसम्म पेरेराको केबलकार सेवा स्थगन रहने जनाइएको छ। पहाडी क्षेत्रका बासिन्दालाई सहरको मुख्य भागसँग जोड्नका लागि कोलम्बियामा केबलकार एक लोकप्रिय सार्वजनिक यातायातको माध्यम हो।
यसैबिच, कोलम्बियाको कफी उत्पादक पहाडी क्षेत्रको अर्को सहर मनिजालेसमा पनि संरचनात्मक क्षतिका कारण केबलकार सेवा बन्द गरी यात्रुहरूको उद्धार गरिएको त्यहाँका नगरप्रमुखले जानकारी दिएका छन्।
सोमबार बिहान पश्चिमी कोलम्बियाको चोको क्षेत्रलाई केन्द्रविन्दु बनाएर गएको ७.४ म्याग्निच्युडको विनाशकारी भूकम्पका कारण ज्यान गुमाउनेको सङ्ख्या कम्तीमा १३२ पुगेको छ भने ५७० भन्दा बढी घाइते भएका छन्। राष्ट्रपतिसँगको विपद् व्यवस्थापन बैठकपछि कोलम्बियन एसोसिएसन अफ क्यापिटल सिटीजले यो तथ्यांक सार्वजनिक गरेको हो।
पेरेरामा ठूलो क्षति: भूकम्पका कारण पेरेरा सहरमा मात्रै ६० जनाको मृत्यु भएको छ।
रेड अलर्ट र पूर्वाधारमा क्षति: देशका पाँच प्रमुख सहरहरूमा ‘रेड अलर्ट’ जारी गरिएको छ। देशभर कम्तीमा ८६ वटा भवनहरू पूर्ण रूपमा भत्किएका छन् भने सातवटा विमानस्थलले आफ्ना उडान तथा सञ्चालन स्थगन गरेका छन्।
कम्पका कारण मुख्य सहर क्याली मा धेरै भवनहरू ढलेका छन् भने उद्धारकर्ता तथा स्थानीय बासिन्दाहरू भग्नावशेषमा फसेकाहरूको खोजी तथा उद्धारमा जुटिरहेका छन्।
Be the first to comment!
© 2026 All right reserved to rastrakhabar.com
Site BY Sobij
ताजा
लोकप्रिय
प्रतिक्रिया दिनुहोस