ब्राजिलका वामपन्थी नेता लुइज इनासियो लुला दा सिल्भाले राष्ट्रपति निर्वाचनमा शानदार पुनरागमन गर्दै चौथो पटक राष्ट्रपति बन्ने अवसर प्राप्त गरेका छन्।

उनले कट्टर दक्षिणपन्थी प्रतिद्वन्द्वी फ्लाभियो बोल्सोनारोलाई झिनो मतान्तरले पराजित गरेका हुन्। निर्वाचनको दोस्रो चरणको मतगणनामा लुलाले ५१.७६ प्रतिशत मत प्राप्त गर्दा फ्लाभियोले ४८.२४ प्रतिशत मत पाएका छन्।

यसअघि लुलाले सन् २००३ देखि २०१० सम्म दुई कार्यकाल ब्राजिलको नेतृत्व गरेका थिए। सन् २०२२ मा तेस्रो पटक राष्ट्रपति निर्वाचित भएका उनी पछिल्लो जितसँगै देशको राजनीतिमा आफ्नो प्रभाव कायम राख्न सफल भएका छन्।

निर्वाचनपूर्वका केही सर्वेक्षणमा फ्लाभियो अगाडि देखिए पनि अन्तिम नतिजा लुलाको पक्षमा आएको बताइएको छ। मतदानका क्रममा सार्वजनिक यातायातको समस्याले मतदातालाई मतदान केन्द्रसम्म पुग्न कठिन भएको भन्दै लुलाको गठबन्धनले गुनासो गरेको थियो। त्यसपछि सर्वोच्च अदालतका एक न्यायाधीशले मतदानको समय दुई घण्टा थप्ने आदेश दिएका थिए।

लुलाको जितलाई ल्याटिन अमेरिकामा दक्षिणपन्थी राजनीतिक शक्तिको बढ्दो प्रभावबीच आएको महत्त्वपूर्ण परिणामका रूपमा हेरिएको छ। अमेरिकी राष्ट्रपति डोनाल्ड ट्रम्पको प्रशासनले यस क्षेत्रका रूढिवादी नेताहरूसँग सम्बन्ध विस्तार गर्न खोजिरहेका बेला लुलाको पुनरागमनले अमेरिका–ब्राजिल सम्बन्धमा नयाँ चुनौती सिर्जना गर्न सक्ने विश्लेषण गरिएको छ।

चुनावी अभियानका क्रममा लुलाले ऋणमाफी, सप्ताहान्तमा निःशुल्क सार्वजनिक यातायात र गरिब विद्यार्थीलाई आर्थिक सहायता उपलब्ध गराउने प्रतिबद्धता जनाएका थिए। विपक्षीले भने यस्ता कार्यक्रमले सरकारी वित्तीय अवस्थामाथि दबाब बढाउन सक्ने भन्दै आलोचना गरेको थियो।

मेटल उद्योगमा काम गरेका तथा ट्रेड युनियनबाट राजनीतिक यात्रा सुरु गरेका ८० वर्षीय लुलाले आफ्नो राजनीतिक जीवनमा गरिबी न्यूनीकरण र सामाजिक कल्याणका कार्यक्रमलाई प्राथमिकता दिँदै आएका छन्। भ्रष्टाचारसम्बन्धी मुद्दामा जेल परेका उनी पछि रिहा भएर राजनीतिमा फर्किएका थिए।

लुलाको पछिल्लो जितले ब्राजिलको राजनीतिमा बोल्सोनारो परिवारले अघि बढाएको दक्षिणपन्थी राजनीतिक आन्दोलनलाई चुनौती दिएको छ। करिब पाँच दशक लामो राजनीतिक यात्रामा प्राप्त यो सफलतालाई उनको राजनीतिक जीवनको अर्को महत्त्वपूर्ण उपलब्धिका रूपमा हेरिएको छ।